Shymkentte UQKD bastyǵynyń burynǵy birinshi orynbasaryna qatysty úkim ózgerdi

ShYMKENT. KAZINFORM — Apellıatsııalyq sot UQK-niń Shymkent qalalyq departamenti bastyǵynyń burynǵy birinshi orynbasary Manat Sarbasovqa qatysty sybaılas jemqorlyq isi boıynsha úkimdi qaıta qarady.

Jazaǵa qatysty múliktik bóliginde ózgerister engizilgenimen, birinshi satydaǵy sottyń negizgi sheshimi kúshinde qaldy. UQKD-niń burynǵy ofıtseri 12 jylǵa bas bostandyǵynan aıyrý jazasyn óteýdi jalǵastyrady.

Apellıatsııalyq alqa Shymkenttegi sońǵy jyldardaǵy eń daýly sybaılas jemqorlyq isteriniń biri boıynsha úkimdi ishinara ózgertti. Sot múliktik sıpattaǵy jazalardy alyp tastaýǵa bolady dep tanydy.

Atap aıtqanda, apellıatsııa Manat Sarbasovtyń atyna tirkelgen Shymkenttegi páterdi tárkileýdi, Toyota Land Cruiser avtokóliginiń quny retinde memleket kirisine óndirilgen 17 mln teńgeni joıý týraly sheshim qabyldady. Bul múlik birinshi satydaǵy sotpen qylmystyq jolmen alynǵan qarajatqa satyp alynǵan dep tanylǵan bolatyn.

Sonymen birge, apellıatsııalyq saty negizgi jazaǵa qaıta qaraýǵa negiz tapqan joq. Sot UQKD-niń burynǵy joǵary laýazymdy qyzmetkeriniń kinási tolyq dáleldengenin atap ótip, 12 jyldyq bas bostandyǵynan aıyrý merzimin ózgerissiz qaldyrdy. Qalǵan bóliginde Sarbasovqa da, is boıynsha ózge tulǵalarǵa da qatysty — birinshi satydaǵy sottyń úkimi kúshinde qaldy.

Eske salaıyq, 2025 jyly 7 qazanda alqabıler úkimimen Manat Sarbasov para alý, qylmystyq jolmen alynǵan tabysty zańdastyrý jáne qyzmettik áreketsizdik úshin kináli dep tanylǵan bolatyn.

Sot oǵan 12 jylǵa bas bostandyǵynan aıyrý jazasyn taǵaıyndady. Sonymen qatar, Sarbasov UQK podpolkovnıgi áskerı ataǵynan aıyryldy. 

Úkimniń jeke tarmaǵynda memleket paıdasyna jeke mektepke qamqorlyq kórsetkeni úshin kásipker áıelden alynǵan para somasy — 70 mln teńgeni óndirip alý kózdelgen. Úkimniń bul bóligi apellıatsııalyq sotpen qaıta qaralǵan joq.

Apellıatsııalyq alqa sondaı-aq istiń ózge qatysýshylaryna qatysty sheshimderdi de qaıta qaraýdan bas tartty. Sarbasovtyń áriptesi, jedel ýákil Aıdos Sraılov zańsyz kásipkerlik qyzmeti úshin bir jylǵa bas bostandyǵyn shekteý jazasyna kesilip, amnıstııaǵa baılanysty jazadan bosatyldy.

Kásipker Erlan Tyshqanbaev 7 jylǵa shartty túrde bas bostandyǵynan aıyrylyp, sot zalynan bosatyldy. Qalalyq densaýlyq saqtaý basqarmasynyń burynǵy basshysy Temirhan Varzılov 4 jylǵa bas bostandyǵyn shekteý jazasyna jáne memlekettik qyzmette ómir boıyna laýazym atqarý quqyǵynan aıyrýǵa sottaldy. Varzılovtyń burynǵy áriptesi Shyńǵys Jańabaev urlyq jasaǵany úshin kináli dep tanylyp, 7 jylǵa bas bostandyǵynan aıyryldy.

Budan buryn Shymkentte UQK-niń burynǵy basshysynyń orynbasaryna qatysty is qorytyndy satyǵa jetkenin jazǵan edik.