Shymkentte tutynýshylardyń gazǵa qaryzy 900 mln teńgeden asqan
ShYMKENT. KAZINFORM — Jylytý maýsymy aıaqtalǵannan keıin Shymkenttegi gaz qyzmetteri baqylaýdy kúsheıtip, tólemi keshiktirilgen abonentterdiń gazyn jappaı óshirýdi bastady.
Qalada tólem jasamaǵan abonentter qatarynda 30 063 tutynýshy bar. Qazirgi tańda kógildir otynǵa jalpy qaryz kólemi 914 530 528 teńgege jetken.
— Mysaly, Jiger kóshesiniń bir turǵyny ótken jylǵy aqpannan beri gaz tólemin jasamaı, shamamen 390 myń teńge qaryz bolǵan. Buǵan deıin ol gazdan ajyratylǵanymen, qyzmetti óz betinshe qaıta qosqan. Endi onyń bereshegine gazdy qaıta qosý jáne dánekerleý jumystarynyń shyǵyndary qosylady, — dedi «QazaqGaz Aımaq» AQ ShÓF marketıng jáne taldaý bóliminiń bastyǵy Sultan Omarov.
Qysqy kezeńde gazben qamtý uıymdary qaryzy bar abonentterdi óshirýdi shekteýli túrde júrgizip, gaz berýdi saqtaýǵa tyrysqan. Alaıda jylytý maýsymy aıaqtalǵan soń bul tásil ózgerdi.
— Biz qaryzy bar abonentterdi óshirýdi bastaımyz. Ony keıinge qaldyrmaımyz. Gaz tek aqyly negizde qaıta qosylady, sondyqtan tutynýshylar úshin jalpy shyǵyn kólemi artady. Shymkent turǵyndaryn tólemderdi keshiktirmeýge shaqyramyz, — dep habarlady kompanııa.
Budan buryn Shymkentte 18 myńǵa jýyq júrgizýshiniń kólik salyǵy boıynsha 1 mlrd teńgeden astam bereshegi bar ekenin jazǵan edik.
