Shymkentte turmystyq zorlyq-zombylyq isteri bir táýlikte sotqa jiberilip jatyr
ShYMKENT. KAZINFORM – Shymkent qalasynyń prokýratýrasy turmystyq zorlyq-zombylyqqa qatysty isterdi jedel qaraý tetigi engizilgenin málimdedi.
Jańa mehanızm aıasynda prokýratýra, sot jáne Sot saraptamalary ınstıtýty arasynda ózara tıimdi is-qımyl jolǵa qoıylǵan.
Nátıjesinde turmystyq zorlyq-zombylyq pen esirtki quraldarynyń zańsyz aınalymyna qatysty qylmystyq teris qylyqtar bir táýlik ishinde sotqa joldanady.
Prokýratýra málimetinshe, qala turǵyndarynyń biri otbasylyq janjal kezinde jubaıyna kúsh qoldanǵan.
Oqıǵa boıynsha sot-medıtsınalyq saraptama qorytyndysy jedel alynyp, kúdikti ýaqytsha ustaý ızolıatoryna qamalǵan.
Qylmystyq is materıaldary sol kúni sotqa jiberilgen.
Engizilgen tártip nátıjesinde osy sanattaǵy 30 qylmystyq is 24 saǵat ishinde sotqa joldanǵan.
Shymkent qalasynyń prokýratýrasy qabyldanǵan júıeli sharalardan keıin turmystyq quqyq buzýshylyqtardy qaıtalaý faktileri tirkelmegenin atap ótti.
Aıta keteıik, buǵan deıin ShQO-da otbasylyq zorlyq-zombylyq kóbeıgeni habarlandy.
