Shymkentte turmystyq qaldyqtardy óńdeý zaýyty salynady
ASTANA. KAZINFORM – Shymkent qalasynda qatty turmystyq qaldyqtardy suryptaý, óńdeý jáne kádege jaratý zaýytyn salýǵa Ispanııa, Qytaı, Germanııa, Koreıa jáne Túrkııa ınvestorlary tarapynan usynystar túsken.
«Qala ákimdiginiń 2023 jylǵy 13 qańtardaǵy №55 qaýlysy negizinde «Green line» qaldyqtardy qaıta óńdeý zaýyty» JShS-niń jeke menshiginen qatty turmystyq qaldyqtar polıgony memlekettik kommýnaldyq menshigine qaıtaryldy. Polıgondaǵy 1,5 mln tonna jartylaı kómilgen jáne 250 myń tonna beı-bereket shashylǵan qoqystar tolyǵymen retke keltirildi. Qazirgi ýaqytta polıgonnyń tolýyna baılanysty jańa polıgon salý úshin 30 ga jer qarastyrylyp, qujattary rásimdelýde», - dep jaýap berdi Shymkent qalalyq ákimdigi Kazinform aqparat agenttigi joldaǵan resmı saýalǵa.
Aqparatta aıtylǵandaı, qatty turmystyq qaldyqtardy suryptaý, óńdeý jáne kádege jaratý zaýytyn salý jónindegi usynystar Ispanııa, Qytaı, Germanııa, Koreıa jáne Túrkııa ınvestorlarynan túsken.
«Atalǵan elder ınvestorlarmen kezdesýde qaldyqtardy aldyn ala suryptaý sharttary qoıylyp, qaldyqtardyń morfologııalyq quramy usynyldy. Árbir sheteldik ınvestor qaldyqtardy energetıkalyq kádege jaratý kezinde alynatyn elektr energııasyna qyzyǵýshylyq tanytýda. Biraq qaldyqtardy energetıkalyq kádege jaratý kezinde alynǵan elektr energııasyna bekitilgen tarıftiń bolmaýyna baılanysty órteý zaýytynyń qurylysy ınvestor úshin ekonomıkalyq turǵydan tıimsiz bolyp otyr», - deıdi ákimdikten.
Ekologııa kodeksiniń 324 babyna sáıkes qaldyqtardy kádege jaratý arqyly óndirilgen elektr energııasyna shekti aýktsıondyq baǵalardy ýákiletti organ (Ekologııa jáne tabıǵı resýrstar mınıstrligi) bekitedi.
«Qaldyqtardy kádege jaratýǵa jumsalatyn elektr energııasynyń tarıfi mınıstrlik tarapynan qarastyrylǵannan keıin qaldyqtardy óńdeý zaýytynyń qurylysy júrgiziledi», - delingen saýal jaýabynda.
