Shymkentte turǵyndar jolaıryq qurylysyndaǵy kólik keptelisine shaǵymdandy
ShYMKENT. KAZINFORM – Shymkentte Báıdibek bı dańǵyly men Tólemetov kóshesiniń qıylysyndaǵy jolaıryq qurylysy 2025 jyldyń jeltoqsan aıynda bastalǵan.
Jolaıryq qurylysyna qatysty áleýmettik jelilerde turǵyndar tarapynan syn-pikirler aıtyldy. Turǵyndar qurylys alańyndaǵy jumys qarqynynyń baıaý júrip jatqanyn, jumysshylar sanynyń az ekenin jáne atalǵan aýmaqta kólik keptelisinen qozǵalys qıyndaǵanyn jazǵan.
Osyǵan baılanysty Shymkent qalasynyń jolaýshylar kóligi jáne avtomobıl joldary basqarmasy túsinikteme berdi. Vedomstvonyń habarlaýynsha, Báıdibek bı dańǵyly men Tólemetov kóshesiniń qıylysyndaǵy jolaıryq qurylysy josparǵa sáıkes júrgizilip jatyr.
– Aýa raıynyń qolaısyzdyǵy men kúnniń aptap ystyǵyna baılanysty jumys kestesine ózgerister engizildi. Qyzmetkerlerdiń túski úzilis ýaqyty óndiristik qaýipsizdik talaptaryna sáıkes rettelip otyr. Qazir qurylys alańynda 10 ınjenerlik-tehnıkalyq qyzmetker men 52 jumysshy eńbek etip jatyr, – delingen resmı málimette.
Basqarmanyń aqparatyna súıensek, qurylys jumystaryna 5 samosval, 8 ekskavator, 3 jol tyǵyzdaǵysh, 1 sý tasymaldaýshy avtokólik, 1 tıegish jáne 1 avtokran jumyldyrylǵan. Joba boıynsha bas merdiger – «BCN Group» JShS, al tehnıkalyq qadaǵalaýshy – «Bannýr B» JShS.
– Qazirgi ýaqytta kópir baǵanalary irgetastaryn salý jumystary 50 paıyz, jergilikti oń jaq ótkel qurylysy 90 paıyz, kópir arqalyqtaryn daıyndaý jumystary 60 paıyz aıaqtaldy. Al kópirdiń ustyndaryn ornatý jáne qurylys beldeýine túsken ınjenerlik jelilerdi qaıta ornalastyrý jumystary tolyq aıaqtaldy. Joba aıasynda Tólemetov jáne Shoqaı kóshelerinde jaıaý júrginshilerge arnalǵan jerasty ótkeliniń qurylysy júrgizilip jatyr, – dep habarlady qalalyq jolaýshylar kóligi jáne avtomobıl joldary basqarmasy.
Vedomstvo ókilderi jolaıryq qurylysyn bıyl jyl sońyna deıin aıaqtaý josparlanǵanyn málimdedi.
Buǵan deıin Shymkentte Báıdibek bı dańǵyly men Tólemetov kóshesiniń qıylysynda jáne kishi aınalma jolda jolaıryq salýǵa bıýdjetten 9,4 mlrd teńge bólinetini týraly jazǵan edik.
Sondaı-aq taıaýda atalǵan jolaıryq qurylysynda 54 jastaǵy jumysshynyń qaza tapqanyn habarlaǵan edik.
