Shymkentte turǵyndar jaǵymsyz ıiske shaǵymdanyp jatyr

ShYMKENT. KAZINFORM — Shymkent turǵyndary shahardaǵy jaǵymsyz ıistiń jaısyzdyq týdyrǵanyn aıtyp, shaǵymdanyp jatyr.

Turǵyndardyń biri gazdyń ıisi dese, endi biri órtten keıingi ystyń ıisi terezeni japsań da seziletinin, tipti úıdiń ishindegi zattarǵa deıin sińip jatqanyn aıtady. 

Áleýmettik jeli qoldanýshylarynyń kópshiligi muny iri óndiris oryndary men munaı óńdeý zaýytymen baılanystyrady.

Osyǵan qatysty Shymkent qalasy boıynsha ekologııa departamenti basshysynyń orynbasary — bas memlekettik ekologııalyq ınspektory Dúısen Qultileýov jaýap berdi.

— «Qazgıdromet» mekemesiniń aqparaty boıynsha, qazirgi tańda qalada joǵarǵy lastaný jáne ekstremaldy joǵarǵy lastaný faktisi tirkelmegen. Qala aýmaǵynda keshki ýaqytta aýada tútinniń baıqalýynyń negizgi sebebi — aýa temperatýrasynyń tómendeýi, avtokólikterdiń kóptep shoǵyrlanýy, jeke sektorlarda qurǵaq shópti, kúzgi japyraqtardy jaǵý jaǵdaılarynyń kóbeıýi, — dedi ol.

Jalpy, Shymkenttiń atmosferalyq aýa sapasyna «Qazgıdromet» mekemesine tıesili 7 baqylaý ekologııalyq beketi arqyly baqylaý júrgiziledi.

Jýyrda turǵyndardyń jaǵymsyz ıiske shaǵymy negizinde departamenttiń synaq zerthanasynyń mamandary «PetroQazaqstanOılProdakts» JShS, Indýstrıaldy aımaqtardyń sanıtarlyq qorǵaý aımaǵynan tys jerde, «Fırkan sıtı» aýmaqtarynda aýa sapasyna monıtorıng júrgizgen.

Vedomstvo ókiliniń sózinshe, sanıtarlyq-qorǵaý aımaǵynda aýa lastaǵysh zattardyń shekti ruqsat etilgen normalardan asyp ketýi deregi anyqtalmaǵan.

— Qaladaǵy 4 iri kásiporyn — «PKOP», «Standarttsement», «Shymkenttsement» JShS jáne «3-Energoortalyq» AQ — avtomattandyrylǵan monıtorıng júıesimen onlaın rejımde baqylanady. Atalǵan júıe naqty ýaqyt rejıminde derekterdi túsiredi, — dep atap ótti departamentten.

Sonymen qatar, turǵyndardyń shaǵymdary boıynsha «Ordabasy» Indýstrıaldy aımaǵyndaǵy bir óndiristik kásiporynǵa tekserý taǵaıyndalǵan.

Bıylǵy 10 aıda ekologııa departamenti tarapynan 29 tekserý júrgizilip, 50 ákimshilik is qozǵalǵan, nátıjesinde shamamen 37,6 mln teńge aıyppul salyndy (32,6 mln teńge óndirildi).

Indýstrıaldy aımaqtarda 12 mekeme tekserýden ótken.

— Ekologııalyq nusqamalardy oryndamaǵan 4 kásiporynǵa (onyń ishinde «Kıtaısko-Kazahstanskaıa Margantsevaıa Indýstrıalnaıa Grýppa» JShS, «HILL» JShS, «Germes BE» JShS, jeke kásipker Habıbýlla) qatysty QR ÁQBtK 462 babynyń 3 tarmaǵy boıynsha hattamalar toltyrylyp, sotqa joldandy, — dep naqtylady vedomstvo.

Ekologııalyq ruqsatsyz jumys júrgizgen 4 kásiporynnyń qyzmeti ýaqytsha toqtatylyp, aıyppul salynǵan.

Budan buryn Shymkentte avtokólik ıeleri gaz tapshylyǵyna shaǵymdanǵanyn jazǵan edik.