Shymkentte tranzıttik baǵyttaǵy sapasyz jol men keptelis turǵyndardyń ashýyn týǵyzdy
ShYMKENT. KAZINFORM – Shymkentte qurylysy baıaýlap turǵan jáne keptelisi kóbeıgen jol bóligi halyqty ábigerge saldy. Respýblıkalyq mańyzy bar kúre joldyń boıyndaǵy 600 metrlik aýmaqtaǵy qolaısyzdyqqa qatysty tıisti basqarma túsinik berdi.
Qurylysy uzaqqa sozylǵan Qursaı shaǵynaýdanyna aparar joldyń jaı-kúıi turǵyndardy ábden mezi etken.
Shymkent arqyly Tashkent pen Túrkistan baǵyttaryn jalǵaıtyn respýblıkalyq mańyzy bar kúre jol boıyndaǵy shamamen 600 metr aýmaqtaǵy jol bóliginiń tozyǵy jetip, kólik qozǵalysyna da, jaıaý júrginshilerge de qolaısyzdyq týdyryp otyr.
Kúnine myńdaǵan kólik ótetin bul baǵytta eki jyldan beri jol jamylǵysynyń sapasy tómendep, kólik keptelisi kóbeıgen. Atalǵan ýchaske arqyly negizinen tranzıttik aýyr júk kólikteri qatynaıdy.
Turǵyndardyń aıtýynsha, qazirgi tańda bul aýmaqta jaıaý júrýdiń ózi qıyn, al qarly, jańbyrly kúnderi jaǵdaı tipti kúrdelene túsedi. Sondaı-aq avtobýs qozǵalysy qıyndaǵan. Bul másele áleýmettik jelilerde de qyzý talqylanyp, turǵyndar tarapynan narazylyq týǵyzdy.
Osyǵan baılanysty Kazinform tilshisine Shymkent qalasy jolaýshylar kóligi jáne avtomobıl joldary basqarmasy resmı jaýap usyndy.
Vedomstvonyń málimetinshe, qazirgi ýaqytta atalǵan aýmaqta Shymkent qalasynyń energetıka jáne ınfraqurylymdy damytý basqarmasynyń tapsyrysy negizinde merdiger uıym – «Rıgolıt» JShS Qursaı shaǵynaýdanyn aýyzsýmen qamtamasyz etý maqsatynda sý qubyry jelilerin júrgizip jatyr.
– Joba aıasynda jol-qurylys jumystary barysynda sý qubyry jelileriniń ornyn aýystyrý qajettiligi týyndady. Osyǵan oraı tıisti jumystar júzege asyrylyp jatyr. Aýa raıynyń qolaısyzdyǵyna baılanysty qurylys-montaj jumystary ýaqytsha baıaýlady. Jobany 2026 jylǵy naýryz aıynyń sońyna deıin aıaqtaý josparlanyp otyr. Turǵyndar men jol qozǵalysyna qatysýshylardan ýaqytsha qolaısyzdyqtarǵa túsinistikpen qaraýdy suraımyz, – delingen basqarmanyń jaýabynda.
Turǵyndardy alańdatqan bul jol aýmaǵy A-2 aınalma jolynyń 5-kezeńine jatady. Jalpy rekonstrýktsııalaý jumystary 2023 jyly bastalǵan. Mamandardyń aıtýynsha, joldy keńeıtý jumystary bıyl aıaqtalady dep josparlanǵan.
Vedomstvonyń málimetinshe, nysan jalpy 8 kezeńnen turady. Qazirgi tańda 1, 2, 3 jáne 4-kezeńderde jol qurylysy tolyq aıaqtalyp, kólik qozǵalysyna berilgen.
– Qursaı jáne Qazyǵurt shaǵynaýdandaryna ınjenerlik jeliler júrgizilmegendikten, 2025 jylǵa deıin tek kútip ustaý jáne shuńqyrlardy jamaý jumystary atqaryldy. Qazir qaıta qurý, ıaǵnı 6 jolaqty jol salý jumystary júrip jatyr, – dedi basqarma ókilderi.
Budan buryn Shymkentte sapasyz salynǵan 170 mln teńgeniń jol jabyny qaıta tóselgenin jazǵan edik.