Shymkentte tozǵan shınalardy qaıta óńdeý qýaty jylyna 10 myń tonnaǵa deıin artty
ASTANA. KAZINFORM- Shymkenttegi «EKO Shına» JShS-niń tozǵan shınalardy qaıta óńdeý qýaty jylyna 6 myń tonnadan 10 myń tonnaǵa deıin ulǵaıdy. Qazaqstan Respýblıkasy Ekologııa jáne tabıǵı resýrstar mınıstrliginiń qoldaýymen kásiporyndy jańǵyrtý jumystary aıaqtalyp, óndiris iske qosyldy.
Jobaǵa «Jasyl damý» AQ kádege jaratý tólemderi esebinen 500 mln teńge bólgen, dep habarlaıdy QR Ekologııa jáne tabıǵı resýrstar mınıstrliginiń baspasóz qyzmeti.
Óndiristi jańǵyrtýǵa arnalǵan qarajat 2024 jylǵy qyrkúıekte bólinip, tolyq ıgerildi. Jobany iske asyrý nátıjesinde kásiporynnyń shınalardy qaıta óńdeý qýaty jylyna 4 myń tonnaǵa artyp, daıyn ónim óndirýge paıdalanylatyn qaıtalama shıkizat kólemi ulǵaıdy.
Kásiporyn tozǵan shınalardan rezeńke túıirshikterin óndiredi. Olar balalar alańdaryna arnalǵan jabyndar jasaýǵa paıdalanylady. Sonymen qatar zaýytta rezeńke-tehnıkalyq buıymdar, sonyń ishinde tyǵyzdaǵyshtar (salnıkter) shyǵarylady.
Aıta keteıik, «Jasyl damý» AQ kádege jaratý tólemderi esebinen jalpy somasy shamamen 116 mlrd teńgege 30 jobany qarjylandyrdy.
-Mundaı jobalar Qazaqstan Respýblıkasynyń Ekologııalyq kodeksine sáıkes qaldyqtardy basqarýdyń zamanaýı ınfraqurylymyn damytýǵa, qaıta óńdeý kólemin arttyrýǵa, kómýge jiberiletin qaldyqtar kólemin azaıtýǵa jáne qaıtalama shıkizatty ekonomıkalyq aınalymǵa tartýǵa yqpal etedi,-delingen habarlamada.
Osyǵan deıin Qazaqstanda iri shınalardy qaıta óńdeý tártibi ózgerýi múmkin ekeni týraly jazdyq.
