Shymkentte Tilenshın kóshesindegi jańa avtokólik ótkeli ashyldy
ShYMKENT. KAZINFORM – Shymkentte Tilenshın kóshesindegi temirjol ústinen salynǵan jańa avtokólik ótkeli tehnıkalyq turǵyda ashylyp, kólik qozǵalysy iske qosyldy.
Іs-sharaǵa qala ákimi Ǵabıt Syzdyqbekov, buqaralyq aqparat quraldarynyń ókilderi jáne jaqyn mańdaǵy eldi mekenderdiń turǵyndary qatysty.
Memleket basshysynyń Shymkent qalasynyń kólik ınfraqurylymyn damytý jónindegi tapsyrmalaryn oryndaý aıasynda Momynov jáne Tilenshın kóshelerindegi ótkelderdiń negizgi qurylysy byltyr bastalǵan. Jobalar qalanyń aýdandary arasyndaǵy baılanysty kúsheıtip, kólik qatynasy men qozǵalys qaýipsizdigin jaqsartýǵa baǵyttalǵan.
Tilenshın kóshesindegi ótkeldiń mańyzy bul ýchaskedegi poıyz qozǵalysynyń joǵary qarqyndylyǵymen baılanysty. Munda táýligine orta eseppen 59 poıyz ótedi. Sonyń saldarynan temirjol ótkeli ár joly 10-20 mınýtqa deıin jabylyp, kólik keptelisi týyndaıtyn.
Jańa nysan avtomobıl jáne temirjol qozǵalysyn bir-birinen bólip, kólikterdiń úzdiksiz júrýine múmkindik beredi.
Bul – bıyl Shymkentte paıdalanýǵa berilgen osyndaı ekinshi nysan. Qańtar aıynda Momynov kóshesindegi avtokólik ótkeli ashylǵan bolatyn. Eki ótkel de avtomobıl joly men temirjol jelisi qıylysatyn ýchaskelerdegi kólik qatynasyn jaqsartýǵa arnalǵan.
– Kólik ınfraqurylymyn damytý Shymkenttiń damý qarqynyna saı júrgizilip, qalanyń ár aýdanyndaǵy turǵyndardyń qajettilikterin eskerýi tıis, – dedi qala ákimi Ǵabıt Syzdyqbekov.
Tilenshın kóshesindegi ótkel ashylǵannan keıin onyń aınalasyndaǵy aýmaqty abattandyrý jumystary jalǵasady. Jańa nysan irgeles kóshelerdegi kólik qozǵalysyn jaqsartyp, temirjoldan ótý qaýipsizdigin arttyrýǵa jáne turǵyndardyń jolǵa ketetin ýaqytyn qysqartýǵa múmkindik beredi.
Aıta keteıik, buǵan deıin Shymkentte Momynov kóshesinde temirjol ústinen jańa avtokólik ótkeli salynyp jatqany jazylǵan edi. Sol kezde nysan qurylysynyń 50 paıyzy aıaqtalǵan bolatyn.
