Shymkentte temirjol ústinen salynyp jatqan jańa kólik ótkeliniń 50%-y daıyn
ShYMKENT. KAZINFORM – Shymkent qalasynda jol-kólik ınfraqurylymyn jańǵyrtý aıasynda Momynov kóshesinde temirjol ústinen jańa avtokólik ótkeli salynyp jatyr. Májilis depýtaty, «AMANAT» partııasy fraktsııasynyń múshesi Bolatbek Najmetdınuly qurylys barysymen tanysty.
Depýtattyń aıtýynsha, joba qalalyq qozǵalysty jeńildetip, keptelisterdi azaıtyp, jol qaýipsizdigin arttyrady. Tórt jolaqty ótkelde jaıaý júrginshiler joly men baǵdarshamdar ornatylady.
Qurylys 2024 jylǵy qarashada bastalyp, qazirgi tańda nysannyń 50 paıyzy daıyn. Merdiger uıym jumystyń josparǵa sáıkes júrip jatqanyn málimdedi.
– Shymkent – elimizdegi eń qarqyndy damyp kele jatqan qala. Jol ótkel «AMANAT» partııasynyń saılaýaldy baǵdarlamasy aıasynda salynyp jatyr jáne bul – bizdiń saılaýshylarǵa bergen naqty ýádelerimizdiń biri. Men osy jobanyń baǵdarlamaǵa enýine bastamashy bolyp, qarjy bólinýine yqpal ettim. Qazir nysannyń qurylysy sátti iske asýda, ony jeke ózim baqylaýda ustaımyn, – dedi Bolatbek Najmetdınuly.
Sonymen qatar, Tilenshın kóshesinde de osyndaı jol ótkeliniń qurylysy júrip jatyr, onyń daıyndyǵy – 20 paıyz. Eki nysan da 2026 jyldyń sońyna deıin paıdalanýǵa beriledi. Bul jobalar qalanyń shyǵys bóligin ortalyqpen baılanystyryp, kólik aǵynyn qaıta bólýge jáne negizgi magıstralderdiń júktemesin azaıtýǵa múmkindik beredi.
2024 jyldyń qorytyndysy boıynsha qala joldarynyń 75 paıyzy jaqsy nemese qanaǵattanarlyq kúıde bolsa, bıyl bul kórsetkishti 90 paıyzǵa jetkizý josparlanǵan. 2026 jylǵa qaraı jalpy uzyndyǵy 1000 shaqyrymnan asatyn 850 kóshege tolyq asfalt tóseledi. Onyń 540 shaqyrymy bıyl júzege asýy tıis.
2025 jyly qalada 32 jańa baǵdarsham ornatylyp, jol belgileri jańartylady jáne rettelmeıtin ótkelderdiń basym bóligi jaryqtandyrylady.
Bolatbek Najmetdınulynyń óńirge sapary aıasynda saılaýshylarmen kezdesýler ótkizý, áleýmettik jáne óndiristik nysandardy aralaý, turǵyndardy jeke qabyldaý josparlanyp otyr.
Aıta keteıik, Óskemende Úlbi kópirinen aqaý shyqty.