Shymkentte tekserilgen jol synamalarynyń 224-i talapqa saı emes
ShYMKENT. KAZINFORM — Shymkent qalasynda jyl basynan beri avtomobıl joldarynyń sapasyna júrgizilgen tekserý kezinde 844 synamanyń 224-i belgilengen talaptarǵa sáıkes kelmegen.
«Jol aktıvteri sapasynyń ulttyq ortalyǵy» RMK Shymkent qalalyq fılıalynyń málimetinshe, zerthanalyq tekserýden ótken synamalardyń 546-sy normatıvtik talaptarǵa saı bolǵan. Bul — jalpy kórsetkishtiń 64,6 paıyzy. Al buǵan deıin sáıkessizdik anyqtalǵan 49 synama boıynsha kemshilikter joıylǵan.
Fılıal ókilderiniń habarlaýynsha, merdiger uıymdar jol sapasyna qatysty eskertýlerdi joıýǵa kirisken.
— Shymkent qalasynda bıyl jol sapasynyń talaptarǵa sáıkes kelmeýine baılanysty qaıta tóselgen avtomobıl joldary joq. Qazirgi ýaqytta merdigerler anyqtalǵan kemshilikterdi joıý jumystaryn júrgizip jatyr, — dedi «Jol aktıvteri sapasynyń ulttyq ortalyǵy» RMK Shymkent qalalyq fılıalynyń dırektory Qanat Joltaev.
Buǵan deıin Shymkentte 2025 jyly sapasyz salynǵan 170 mln teńgeniń jol jabyny merdiger esebinen qaıta tóselgenin habarlaǵan edik.
Sondaı-aq qaladaǵy 10 kóshede asfalt jabyny shógip ketkeni týraly jazǵan bolatynbyz.
