Shymkentte tegin balmuzdaq taratqan kásipker qamaýǵa alynady
ShYMKENT. KAZINFORM — Ruqsat etilmegen aktsııa úshin ol bes táýlikke qamaýǵa alynyp, aıyppul tóleıtin boldy.
Oqıǵa 1 maýsym kúni Turan-2 shaǵynaýdanyndaǵy «Jańalyq» sýpermarketiniń janynda boldy. Uıymdastyrýshy balalarǵa tegin balmuzdaq taratýǵa ýáde etken.
Kelýshilerdiń, negizinen balalardyń kóptep jınalýy saldarynan kezek sońynda keptelis bastalǵan. Taratýdy jedeldetý maqsatynda uıymdastyrýshylar balmuzdaqty tikeleı toptyń arasyna laqtyra bastaǵan. Keıbir balmuzdaq adamdardyń basyna túsken. Kýágerler oqıǵanyń retsiz ótkeni men baqylaýdyń bolmaǵanyn jetkizdi.
Kásipkerge Qazaqstan Respýblıkasynyń Ákimshilik quqyq buzýshylyqtar kodeksiniń eki baby boıynsha jaýapkershilikke tartyldy.
Atap aıtar bolsaq, 488-1-bap «Ýákiletti organdy eskertpeı qoǵamdyq is-shara ótkizý» boıynsha oǵan 50 AEK — 196 600 teńge kóleminde aıyppul salyndy. Sonymen qatar, sot 434-bap «Usaq buzaqylyq» boıynsha kásipkerdi bes táýlikke ákimshilik qamaýǵa alý týraly sheshim shyǵardy.
Aıta keteıik, budan buryn Shymkentte polıtsııa qyzmetkeri moped júrgizýshisine tas laqtyrǵanyn jazǵan bolatynbyz.