Shymkentte tegin 10 sotyq jer kezeginde 280 myńnan astam adam tur
ASTANA.KAZINFORM — Shymkentte jeke turǵyn úı salýǵa beriletin tegin jer kezeginde turǵan azamattar sany 280 myńnan asty. Al aımaqta jer telimderin bólý 18 jyl buryn toqtatylǵan.
Memleket beretin 10 sotyq jer telimin alý kezeginde 280 302 adam tur. Shymkent qalalyq jer qatynastary basqarmasy basshysynyń orynbasary Baqyt Omarhanov Kazinform agenttigine bos jerlerdiń tapshylyǵy men ınfraqurylymǵa qatysty másele týraly baıandady. Onyń aıtýynsha, zań normalary jerdi bólý tártibin qatań retteıdi.
— Qazaqstan Respýblıkasynyń Jer kodeksiniń 44-babynyń 5-3-tarmaǵyna sáıkes, jeke turǵyn úı qurylysyna arnalǵan jer telimderi aýmaqtyń qurylys jospary daıyndalǵan soń beriledi. Bos jerlerdi bólip berý úshin ınjenerlik ınfraqurylym da (sý jáne elektr júıeleri) daıyn turýy kerek, — dedi ol.
Basqarma usynǵan málimetke sáıkes, qazir Shymkentte qurylysqa daıyn bos alqap joq.
— Halyq suranysyna saı, ınfraqurylymy daıyn jer joq bolǵandyqtan, úı salýǵa arnalǵan jer telimderin bólý múmkin emes, — dedi Baqyt Omarhanov.
Qalalyq jer qatynastary basqarmasy bos aýmaq tapshylyǵy qansha ýaqyttan beri jalǵasyp kele jatqanyn da málimdedi.
— Shymkent qalasy ákimdigi 2008 jyldan beri jeke turǵyn úı qurylysyna arnalǵan jer telimderin bergen joq, — dedi basshy orynbasary.
Basqarma málimetine saı, qurylysqa jaramdy bos aýmaqtar paıda bolǵan jaǵdaıda azamattar jerdi kezek boıynsha alady.
Aıta keteıik, Qazaqstan Respýblıkasynyń Jer kodeksine sáıkes, kámeletke tolǵan ár azamat memleketten 10 sotyq jerdi tegin alýǵa quqyly. 2022 jyldyń 1 naýryzynan bastap eGov.kz portaly arqyly jer kezegine tirkelýge nemese derekterdi ózgertýge bolady.
Jerdi ıelengen adam úsh jyl ishinde úı salýǵa tıis, ol úlgermegen jaǵdaıda aýmaq memleket menshigine qaıtarylýy múmkin. Buǵan deıin Shymkent qalasynyń jer qatynastary basqarmasynyń basshysy Azat Islamov zańsyz qurylys máselesi jer telimderine degen joǵary suranyspen tikeleı baılanysty ekenin aıtqan edi. Onyń sózinshe, 2023 jyldan bastap respýblıkalyq mańyzy bar qalalarda jer alý kezegine qoıý toqtatylǵan. Azamattar ózge óńirde kezekke tura alady.
Elektrondy esep júıesi engizilgennen keıin qazaqstandyqtar turǵylyqty qalasynan basqa aımaqta tegin jer ıelene alady. Bul ózgeristiń nátıjesinde Túrkistan oblysynda jeke turǵyn úı qurylysyna arnalǵan 10 sotyq jer alý kezegi jarty mıllıon adamnan asqan.
Aıta ketelik Túrkistannyń jańartylǵan bas jospary: qansha gektar jer memleket muqtajyna alynatyny týraly jazǵan edik.
Darııa Ǵumar
