Shymkentte tanymal telefon dúkeni ornalasqan nysan súrilip jatyr
ShYMKENT. KAZINFORM – Qala turǵyndaryna «Garant» dúkeni retinde belgili nysan zańsyz dep tanylyp, buzylyp jatyr.
Shymkent qalalyq orta sapasy jáne baqylaý basqarmasynyń mamandary Táýke han dańǵyly men Ahmet Baıtursynov kóshesiniń qıylysynda ornalasqan úıge japsarlas salynǵan eki nysandy tekserdi.
Tekserý barysynda nysandarda uıaly telefondar satylyp, jóndeý qyzmetteri kórsetilgeni, sondaı-aq memlekettik menshiktegi jer ýchaskeleriniń zańsyz paıdalanylǵany anyqtaldy. Budan bólek tıisti qujattar rásimdelmeı qurylys júrgizilgen.
— Nysandardyń menshik ıeleri ákimshilik jaýapkershilikke tartyldy. Ǵımarattardy buzý týraly sotqa talap-aryz berildi. Sot sheshimimen qurylys nysandary zańsyz dep tanylyp, qazirgi tańda buzylyp jatyr, — delingen qala ákimdigi taratqan aqparatta.
Osyǵan baılanysty ákimdik ókilderi menshik ıelerin qurylys-montajdaý jumystaryn bastamas buryn zań talaptary men qurylys normalaryn qatań saqtaýǵa shaqyrdy.
Vedomstvonyń málimetinshe, zań talaptary saqtalmaǵan jaǵdaıda menshik ıelerine iri kólemde aıyppul salynyp, zańsyz salynǵan qurylys nysandary buzylýy múmkin.
Buǵan deıin Shymkentte bıyl zańsyz berilgen 52 jer ýchaskesi anyqtalǵanyn jazǵan edik.
