Shymkentte taqyr jerge asfalt tóselip, jol salynyp jatqan vıdeo tarady

ShYMKENT. KAZINFORM – Áleýmettik jelide Shymkent qalasyndaǵy kóshelerdiń birinde taqyr jerdiń ústine asfalt tóselip jatqan vıdeo tarady.

Jelide talqyǵa túsken vıdeoda turǵyn shaǵal tasy joq jerge asfalt salyp, kúrekpen tegistep jatqan jumysshylardy synǵa alǵan. Atalǵan jaıtqa qatysty Shymkent qalasy Jolaýshylar kóligi jáne avtomobıl joldary basqarmasy túsinik berdi.

– Merdiger mekeme «Alem Trans Jol» JShS tarapynan Abaı aýdanyndaǵy Táýelsizdikke 20 jyl turǵyn alabynda ornalasqan Úshqońyr kóshesine bir qabat asfalt jabyndysy salyndy. Kórsetilgen aýmaqtaǵy jolda buǵan deıin jer negizi bolǵan, sondyqtan asfalt tóseý aldynda qosymsha topyraq nemese shaǵal tas qabatyn salý qajettiligi bolmady. Al vıdeodaǵy kúrekpen atqarý jumystary – qudyqsha qaqpaqtaryn ashý jáne deńgeıin retteý maqsatynda júrgizilgen tehnıkalyq protsess ekenin málimdeımiz. Sonymen qatar merdigerge sapa talaptaryn saqtaý boıynsha eskertý berildi. Qazir kórsetilgen aýmaqtaǵy asfalt qabaty turǵyndardyń ótinishine sáıkes, qaıta tóseldi, – delingen basqarmanyń usynǵan jaýabynda.

Budan buryn Shymkentte kólikter asfalt astyna túsip ketkenin jazǵan edik.