Shymkentte suıytylǵan munaı gazyn bólýdiń jańa tsıfrlyq tetigi iske qosyldy
ASTANA. KAZINFORM — Búgin Shymkent qalasynda suıytylǵan munaı gazyn bólý josparyn iske asyrýǵa arnalǵan kóshpeli keńes ótti, dep habarlaıdy Energetıka mınıstrliginiń baspasóz qyzmeti.
Keńeske Shymkent qalasy ákimdiginiń basqarmalary, Energetıka mınıstrliginiń qyzmetkerleri, jergilikti atqarýshy organ ókilderi, Tsıfrlandyrý departamentiniń dırektory, sondaı-aq Shymkent qalasynyń suıytylǵan munaı gazy naryǵyna qatysýshy sýbektileri qatysty.
Іs-shara barysynda tsıfrlyq servıstiń tájirıbelik paıdalanýǵa sátti engizilgeni habarlandy. Onyń aıasynda naryq sýbektilerinen II jáne III toqsandarǵa ótinimderdi qabyldaý jáne óńdeý jasandy ıntellekt elementterin qoldana otyryp júzege asyrylyp jatyr.
— Jobaǵa salalyq derekterdi ıntellektýaldy óńdeýge arnalǵan oqytylǵan Llama 3.1 (8B) tildik modeli ıntegratsııalanǵan. Tsıfrlyq servıstiń JI-agenti júkteletin qujattardy — jetkizý sharttaryn, elektrondyq shot-faktýralardy jáne taýarlarǵa ilespe júkqujattardy avtomatty túrde oqyp, taldap jáne salystyra alady, — delingen habarlamada.
Keńes aıasynda tsıfrlyq servıstiń jumys isteýine qatysty ózekti máseleler de talqylandy. Naryq sýbektileri men JAO qyzmetkerlerine ótinim berý qaǵıdalary, fýnktsıonaldy durys paıdalaný jáne avtomatty bólý algorıtmderi boıynsha jan-jaqty túsindirý jumystary júrgizildi.
Atalǵan aqparattyq servısti jáne ozyq jasandy ıntellekt tehnologııalaryn engizý suıytylǵan munaı gazyn bólýdiń ashyq tsıfrlyq tetigin qalyptastyrýdaǵy mańyzdy qadam bolmaq. Bul elimizdiń barlyq óńirlerin turaqty otynmen qamtamasyz etýge yqpal etedi.
Budan buryn Qazaqstanda suıytylǵan gazdy syrtqa shyǵarýǵa tyıym taǵy alty aıǵa uzartylǵanyn jazdyq.
