Shymkentte 2 aıdan beri sý qubyry apatynyń saldary áli de joıylmaǵan
ShYMKENT. KAZINFORM — Shymkent qalasynyń Qaınarbulaq turǵyn alabynda eki aı buryn bolǵan kommýnaldyq apattyń saldary áli joıylǵan joq. Turǵyndardyń aıtýynsha, sý qubyrynyń jarylýynan keıin topyraq birtindep shógip, úılerdiń qabyrǵalarynda jaryqtar paıda bolyp jatyr.
Turǵyndar oqıǵa ornynan jýrnalısterge foto men beınejazbalardy joldap, áleýmettik jelilerde jazba jarııalap, óz alańdaýshylyǵyn bildirgen. Olar apattan keıin úılerdiń irgetasy álsirep, turǵyndar qaýipti jaǵdaıda ómir súrip jatqanyn aıtady.
Turǵyndardyń aıtýynsha, sýdyń aǵyp ketýi Sadovaıa kóshesinde bastalyp, shamamen bir aıǵa sozylǵan. Osy ýaqyt aralyǵynda úılerdiń astyndaǵy topyraq shaıylyp, saldarynan birqatar qurylystyń búlinýine sebep bolǵan.
— Apat kezinde jedel qyzmetter kelip, alǵashqy sharalardy qabyldady. Alaıda keltirilgen zalal men onyń naqty kólemi osy kúnge deıin tolyq baǵalanǵan joq. Bizge másele sheshildi dep aıtylǵanymen, shyn máninde jaǵdaı ózgermedi. Sońǵy eki aı boıy biz qorqynyshpen ómir súrip kelemiz — úılerimiz úshin, ári ózimizdiń ómirimiz úshin. Bastapqyda kómek kórsetilgen edi, qazir bári toqtap qaldy. Biz óz máselemizben ońasha qaldyq, — deıdi turǵyndardyń biri.
Onyń aıtýynsha, bir úı tolyǵymen buzylyp, taǵy eki baspana apatty dep tanylǵan.
Shymkent qalasy ákimdigine qarasty «Sý arnasy jáne káriz basqarmasy» mekemesi sý qubyrynyń jarylǵanyn rastady. Sýdyń aǵyp ketýi 12 qyrkúıek kúni bastalǵanyn aıtty.
— Saǵat 15:30–da Qaınarbulaq turǵyn alabyndaǵy Sadovaıa kóshesinde qorshaýdyń qıraýy týraly ótinish tústi. Tekserý kezinde dıametri 355 mm sý qubyrynyń jarylǵany anyqtaldy. Saldarynan tórt úıge zaqym kelip, turǵyndarǵa materıaldyq shyǵyn keltirildi, — dep málim etti mekeme ókilderi.
Kásiporynnyń dereginshe, demeýshilerdiń esebinen jóndeý jáne qalpyna keltirý jumystary bastalyp, basqa páterge ýaqytsha kóshirilgen otbasylarǵa turǵyn úıdi jalǵa alý úshin ótemaqy tólengen.
— Alaıda bul sý júıesi kásiporynnyń teńgeriminde bolmaǵandyqtan, ketken shyǵyndy óteýdiń quqyqtyq negizi joq, — dep túsindirdi kompanııa ókilderi.
Atalǵan máselege baılanysty Kazinform tilshisiniń resmı saýalyna bergen jaýabynda qala ákimdigi birqatar mekenjaı boıynsha qalpyna keltirý jumystary júrgizilip jatqanyn habarlady.
— Jańaqurylys kóshesindegi 330-úıdiń irgetasy berik etildi. Úıdiń myqtylyǵyn arttyrý úshin irgetastyń aınalasyna temir qańqa ornatylyp, qosymsha beton quıyldy. Úıdiń aınalasyndaǵy eski qorshaý alynyp tastaldy, qazir ony qaıta qalpyna keltirý jumystary júrip jatyr. Kelesi kezeńde úıdiń ishi jóndeledi: qabyrǵalar men edender jóndelip, sý, jaryq jáne basqa ınjenerlik júıeler jańartylyp, árleý jumystary jasalady, — delingen jaýapta.
Ákimdik málimetinshe, Sadovaıa kóshesindegi 3-úı apatty jaǵdaıǵa baılanysty buzyldy. Jańa úı salýdyń negizgi kezeńderiniń biri — irgetas jasalyp, oǵan temir-beton quıylǵan. Kelesi qadamdarda qurylysshylar úıdiń tirek qurylymdaryn kóterip, edenderdi tósip, shatyrdy jasaıdy, sý, elektr sııaqty ınjenerlik júıelerdi ornatady jáne ishki-syrtqy árleý jumystaryn atqarady.
Oǵan qosa, Sadovaıa kóshesi, 2-úı — ǵımarattyń negizi kúsheıtilip, betondy irgetas quıyldy. Aldaǵy ýaqytta úıdiń ishki bólikterin qalpyna keltirý, qabyrǵalar men edenderdi jóndeý, ınjenerlik jeliler men árleý jumystaryn oryndaý josparlanyp otyr.
Sonymen qatar Jańaqurylys kóshesi, 668/1-úı — kúsheıtilgen irgetas tósemi quıylyp, keıin ishki jóndeý, ınjenerlik júıelerdi, qabyrǵalar men edenderdi qalpyna keltirý jumystary júrgiziledi.
Buǵan deıin Qostanaıda qysymmen jumys isteıtin káriz kollektorynyń qubyry jarylyp, mańaıdaǵy aýmaqtar, sonyń ishinde «Energetık» saıajaı ýchaskeleri sý astynda qalǵanyn jazǵanbyz.