Shymkentte sý nysandaryn jekeshelendirý sot arqyly jaramsyz dep tanyldy

ASTANA. KAZINFORM – Shymkent qalasyndaǵy sýmen jabdyqtaý jáne sý burý nysandary memleket menshigine qaıtaryldy. Bul týraly Shymkent qalasynyń mamandandyrylǵan aýdanaralyq ekonomıkalyq sotynyń sheshimi negizinde málim boldy.

2004 jyldan bastap memleket úlesiniń 22%-yn quraıtyn sýmen jabdyqtaý nysandaryn «Sý resýrstary – Marketıng» JShS basqarǵan. Qarjy monıtorıngi agenttiginiń Shymkent qalasy boıynsha departamenti júrgizgen qarjylyq taldaý nátıjesinde kompanııada seriktes qurylymdarmen baılanysty kúmándi qarjy operatsııalary men shyǵyn belgileri anyqtaldy.

- Sýmen jabdyqtaý salasyndaǵy zań buzýshylyqtar, onyń ishinde Sý kodeksiniń talaptaryna sáıkessizdik, jekeshelendirý kezinde protsedýralyq aýytqýlar jáne tıimsiz basqarý faktileriniń anyqtalýyna baılanysty materıaldar nysandardy memleket menshigine qaıtarý úshin ákimdikke joldandy, - dep jazdy agenttikten.

Shymkent qalasynyń mamandandyrylǵan aýdanaralyq ekonomıkalyq soty sýmen jabdyqtaý jáne sý burý nysandaryn jekeshelendirýdi jaramsyz dep tanyp, olardy bastapqy jaǵdaıyna keltirip, memleket menshigine qaıtarý týraly sheshim shyǵardy.

Ákimdik bergen málimetter boıynsha, sýmen jabdyqtaý tarıfi 30%-ǵa deıin tómendeıdi dep kútilýde.

Buǵan deıin Shymkentte aptap ystyqtan elektr jelileri isten shyǵyp, keı aýdanda jaryq sónip qalǵan.