Shymkentte stýdentterdi áleýmettik jeli arqyly aldaǵan kúdiktiler ustaldy

ShYMKENT. KAZINFORM –  Shymkent qalasynyń polıtsııa departamenti kıberqylmysqa qarsy is-qımyl basqarmasynyń qyzmetkerleri megapolıstegi joǵary oqý oryndarynyń biriniń stýdentterin aldaý shemasynyń jolyn kesti. 

Tergeý málimetteri boıynsha, 2025 jyldyń qazan aıynan bastap eki kúdikti TikTok áleýmettik jelisi arqyly stýdentterdiń paraqshalaryn anyqtap, arnaıy bottardyń kómegimen olardyń uıaly telefon nómirleri men jeke derekterin jınaǵan. Keıin oqý ornynyń portal júıesi arqyly stýdentterdiń úlgerim kórsetkishterin tekserip, keıbir stýdentterdiń synaqtar boıynsha jetkiliksiz baldary baryn anyqtaǵan.

— Kúdiktiler stýdentterge ýaqytsha nómirler arqyly messendjerde habarlasyp, ózderin ýnıversıtet qyzmetkerleri retinde tanystyrǵan. Olar synaqtan ótý úshin bir ball jetispeıtinin, sol sebepten akademııalyq qaryz nemese emtıhanǵa jiberilmeý qaýpi bar ekenin aıtyp, «máseleni sheship berýdi» jáne baǵalardy «túzetýdi» usynǵan. Osy jalǵan qyzmet úshin ár stýdentten 70-80 myń teńge alyp, habarsyz ketken, — delingen habarlamada. 

Qazirgi tańda kúdiktilerdiń alty epızodqa qatysy bar ekeni anyqtaldy, tergeý amaldary júrgizilip jatyr.

Aıta ketelik byltyr ınternet alaıaqtyq faktisi 22%-ǵa artqany týraly jazǵan edik.