Shymkentte strategııalyq sý nysandary sot sheshimimen memleketke qaıtaryldy

Shymkent qalasynyń ákimdigi sýmen jabdyqtaý jáne sý burý nysandaryn memleket menshigine qaıtarý jónindegi sot isinde jeńiske jetti.

Qalalyq sot strategııalyq mańyzy bar nysandardy memleket menshigine qaıtarý týraly sheshimdi ákimdik paıdasyna shyǵardy. Apellıatsııalyq saty bul sheshimdi ózgerissiz qaldyryp, «Sý resýrstary-Marketıng» JShS-niń shaǵymyn qanaǵattandyrýsyz qaldyrdy.

Ákimdiktiń habarlaýynsha, qalada kommýnaldyq ınfraqurylymnyń strategııalyq nysandaryn basqarý máselelerin qoldanystaǵy zań talaptaryna sáıkestendirý baǵytynda kezeń-kezeńimen júıeli jumys júrgizilip keledi.

— Bul sharalar QR Premer-Mınıstriniń tóraǵalyǵymen ótken ekonomıkany monopolııadan aryltý jónindegi komıssııa sheshimderin oryndaý aıasynda qolǵa alynǵan. Negizgi maqsat — tirshilikti qamtamasyz etý salasynda ashyqtyqty qamtamasyz etý, zań talaptarynyń saqtalýyn kúsheıtý jáne turǵyndar múddesin qorǵaý, — delingen qala ákimdigi taratqan aqparatta.

Másele «Sý resýrstary-Marketıng» JShS-niń qaramaǵyndaǵy sýmen jabdyqtaý jáne sý burý nysandaryn jekemenshik basqarýǵa berý kezinde quqyqtyq negizderdiń zańdylyǵyn taldaýdan bastalǵan. Tekserý barysynda nysandardy jekeshelendirý kezinde zań buzý anyqtaldy.

— Osyǵan baılanysty qala ákimdigi zańda belgilengen tártippen strategııalyq mańyzy bar kommýnaldyq ınfraqurylym nysandaryn memleket menshigine qaıtarý úshin sotqa júgindi. 2025 jyly Shymkent qalasynyń mamandandyrylǵan aýdanaralyq ekonomıkalyq soty jekeshelendirýdi jaramsyz dep tanyp, nysandardy memleket menshigine qaıtarý týraly sheshim qabyldady, — dep málimdedi vedomstvo.

«Sý resýrstary-Marketıng» JShS apellıatsııalyq shaǵym túsirgenimen, apellıatsııalyq saty sot sheshimin ózgerissiz qaldyrdy. Osylaısha, ákimdik talaptarynyń zańdylyǵy rastalyp, nysandar memleket menshigine qaıtaryldy.

Shymkent qalasynyń ákimi Ǵabıt Syzdyqbekov «Sý resýrstary marketıngi» mekemesin memleket menshigine qaıtarýǵa qatysty pikir bildirgen bolatyn. 

Budan buryn habarlaǵandaı, Shymkenttegi eń iri sý jetkizýshi operator tóńireginde taǵy da daý týyndaǵanyn jazǵan edik.