Shymkentte stalkıng deregi boıynsha aıyptalǵan azamatqa sot úkimi shyqty

ShYMKENT. KAZINFORM – Shymkentte burynǵy tanysyn ańdyp, baılanys ornatýǵa májbúrlegen azamat sot úkimimen kináli dep tanylyp, jaza taǵaıyndaldy. 

Shymkent qalasynyń qylmystyq ister jónindegi aýdanaralyq sotynda «Stalkıng» baby boıynsha qylmystyq is qaraldy.

Qalalyq sottyń málimetinshe, sottalýshy 2022-2025 jyldar aralyǵynda jábirlenýshimen jigit-qyz retinde sóılesip, kezdesip aralasyp júrgen. 2025 jyldyń jeltoqsan aıynda aralaryndaǵy túsinispeýshilikten keıin jábirlenýshi onymen qarym-qatynasty toqtatyp, kezdesýden bas tartqan.

– Alaıda sottalýshy jábirlenýshiniń qarsylyǵyna qaramastan onymen baılanys ornatýǵa tyrysyp, ańdyǵan. Sot onyń áreketterin zorlyq-zombylyqsyz, biraq jábirlenýshiniń jeke ómirine qol suǵylmaýshylyq quqyǵyn jáne erkin júrip-turýyna kedergi keltirgen zańsyz qýdalaý retinde baǵalady, – delingen habarlamada.

Prokýror sottalýshyǵa qoǵamdyq jumystarǵa tartý jazasyn taǵaıyndaýdy surady. Jábirlenýshi keshirim bermeıtinin bildirgenimen, jeńil jaza qoldanýdy ótingen. Sottalýshy kinásin tolyq moıyndap, ókinish bildirdi.

– Sot shyn nıetpen ókinýdi jaýapkershilikti jeńildetetin mán-jaı retinde eskerip, aýyrlatatyn jaǵdaılardy anyqtamady. Aıyptalýshy QK-niń 115-1-baby boıynsha kináli dep tanylyp, 100 saǵatqa qoǵamdyq jumystarǵa tartyldy, – dep málimdedi vedomstvo.

Úkim zańdy kúshine engen joq.

Budan buryn Shymkentte polıtsııa stalkıngtiń eki deregin áshkerelegenin jazǵan edik.