Shymkentte sottalǵan polıtseılerge qatysty úkim qaıta ózgerdi

Shymkentte polıtsııa departamentiniń laýazymdy tulǵalaryna qatysty sot úkimi apellıatsııalyq tártipte qaıta qaraldy, dep habarlaıdy Kazinform. 

Buǵan deıin Shymkent qalasynyń qylmystyq ister jónindegi mamandandyrylǵan aýdanaralyq sotynda 31 jastaǵy turǵyn Nurbolat Jumabaevtyń ólimine qatysy bar dep aıyptalǵan tórt polıtsııa qyzmetkerine qatysty úkim shyqqan bolatyn.

Shymkent qalalyq sotynyń qylmystyq ister jónindegi sot alqasy bir top adamdar arasynda zorlyq-zombylyq qoldanyp, bılikti asyra paıdalanyp, azaptap óltirdi dep aıyptalǵan polıtsııa qyzmetkerlerine qatysty atyshýly qylmystyq is boıynsha úkimdi apellıatsııalyq tártipte qaıta qarady.

«Shymkent qalalyq sotynyń qylmystyq ister jónindegi sot alqasynyń 2023 jylǵy 31 qazandaǵy qaýlysymen Shymkent qalasynyń qylmystyq ister jónindegi aýdanaralyq soty 2023 jylǵy 30 maýsymdaǵy úkiminiń sottalǵandar Ý.Janıbekovke jáne D.Isaevqa qatysty bóligi ózgertildi», - delingen Shymkent qalalyq sotynyń baspasóz qyzmeti usynǵan aqparatta.

Ý.Janıbekovtiń QK-niń 146-babynyń 3-bóligimen saralanǵan is-áreketteri QK-niń 146-baby 2-bóliginiń 1) tarmaǵyna aýystyrylyp saralanyp, oǵan osy bap boıynsha quqyq organdarynda laýazymdy qyzmet atqarý quqyǵynan 3 jyl merzimge aıyra otyryp, 3 jyl 6 aı merzimge bas bostandyǵynan aıyrý jazasy taǵaıyndaldy.

QK-niń 58-baby 3, 5-bólikteri negizinde onsha qatań emes jazany neǵurlym qatań jazaǵa aýystyrý jolymen túpkilikti quqyq qorǵaý organdarynda laýazymdy qyzmet atqarý quqyǵynan 3 jyl merzimge aıyra otyryp, 3 jyl 6 aıǵa bas bostandyǵynan aıyrý jazasy taǵaıyndaldy.

D.Isaevti QK-niń 362-babynyń 1-bóligimen kináli dep tapqan bóliginiń kúshi joıylyp, ol is-áreketterinde atalǵan qylmystyq quqyq buzýshylyqtyń quramy bolmaýyna baılanysty aqtaldy.

Úkimniń qarar bóligindegi D.Isaevqa QK-niń 58-baby 3, 5-bólikteri negizinde onsha qatań emes jazany neǵurlym qatań jazaǵa sińirý jolymen túpkilikti taǵaıyndalǵan jazanyń kúshi joıyldy.

D.Isaev QK-niń 146-baby 2-bóliginiń 1) tarmaǵymen quqyq organdarynda laýazymdy qyzmet atqarý quqyǵynan 3 jylǵa aıyra otyryp, 3 jyl 6 aı merzimge bas bostandyǵynan aıyrý jazasyna sottalǵan dep esepteldi.

Shymkent qalalyq sotynyń baspasóz qyzmetiniń aqparatyna súıensek, úkimniń qalǵan bóligi ózgerissiz qaldyrylǵan. Úkim zańdy kúshine endi.