Shymkentte sot balalaryna qatygezdik kórsetken áıeldi ana quqyǵynan shektedi
ShYMKENT. KAZINFORM – Shymkent qalasynda týǵan balalaryn aıaýsyz azaptaǵan áıel sot sheshimimen ata-ana quqyǵynan shekteldi.
Іs Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynda qaraldy. Qalalyq bilim basqarmasy jaýapkerge qatysty ata-ana quqyǵynan shekteý jáne alıment óndirý týraly talappen sotqa júgingen.
Sottyń málimdeýinshe, áıel kámeletke tolmaǵan tórt balanyń anasy, al balalardyń ákesi qazirgi tańda shetelde.
– Jaýapker E. kámeletke tolmaǵan balalaryna qatysty qatygezdik kórsetkeni anyqtalǵan. Balalardyń ákesi bul jaǵdaıdan habardar. Sot «Neke (erli-zaıyptylyq) jáne otbasy týraly» QR kodeksiniń talaptaryn jáne kámeletke tolmaǵan balalardyń múddesin negizge alyp, talap qoıýdy qanaǵattandyrdy, – delingen Shymkent qalalyq sotynyń habarlamasynda.
Sot sheshimi zańdy kúshine engen joq.
Vedomstvo ókilderi balalardyń anasyna qatysty qylmystyq is sot óndirisine túskenin jáne sot aktisi týraly qosymsha habarlanatynyn atap ótti.
Buǵan deıin habarlaǵanymyzdaı, oqıǵa týraly aqparat bilim berý uıymynan túsken. Muǵalimder oqýshylardyń denesindegi jaraqattardy baıqap, quqyq qorǵaý organdaryna habarlaǵan. Atalǵan derek boıynsha qylmystyq is qozǵaldy.
Otbasynda tórt bala tárbıelenip kelgen. Turmystyq zorlyq-zombylyqqa úlken eki ul bala ushyraǵan. Anasy balalardy «tyńdamaǵany úshin» jazalaǵanyn aıtyp, denelerin ystyq útikpen kúıdirip, shanyshqymen jaraqattaǵan. Sonyń saldarynan balalar fızıkalyq jáne psıhologııalyq zardap shekken.
