Shymkentte SOS batyrmalary kóbeıdi

ShYMKENT. KAZINFORM - Qurylǵylar vandalızmge tózimdi bolyp jasalǵan.

Azamattardyń polıtsııamen jedel baılanysqa shyǵýyna múmkindik beretin dabyl túımeler júıesi qalanyń halyq kóp shoǵyrlanatyn oryndarynda ornalasqan. Qurylǵy arqyly birden polıtsııa departamentiniń jedel basqarý ortalyǵymen aýdıo jáne beıne baılanysqa qosylýǵa bolady.

Ár SOS batyrmasy kamera, mıkrofon jáne dınamıkpen jabdyqtalǵan. Bul operatorǵa qońyraý shalýshyny kórýge, estýge jáne polıtsııa narıady kelgenge deıin qajetti nusqaýlyqtar berýge múmkindik beredi. Dabyl túsken boıda jedel basqarý ortalyǵynyń ınspektory jaqyn mańdaǵy patrýldik jasaqty nemese ýchaskelik polıtseıdi oqıǵa ornyna jiberedi.

- SOS batyrmalary kóp adam jınalatyn qoǵamdyq oryndarǵa ornatylyp, qylmystyń aldyn alý jáne qaýipsizdikti kúsheıtý maqsatyn kózdeıdi. Bul qurylǵylar vandalızmge tózimdi etip jasalǵan. Jaqyn arada qala aýmaǵynda qosymsha 50 qurylǵy ornatý josparlanyp otyr. Bul tótenshe jaǵdaılarǵa áreket etý ýaqytyn edáýir qysqartyp, qoǵamdyq tártipti qamtamasyz etýge yqpal etedi, - delingen Shymkent qalasy Polıtsııa departamentiniń baspasóz qyzmeti usynǵan aqparatta.

Aıta keteıik, budan buryn Shymkentte qoǵamdyq oryndardy lastaǵan 1600-den asa turǵyn jaýapqa tartylǵan bolatyn.