Shymkentte sońǵy 3 jylda ónerkásip salasynda 2,5 myńnan astam jumys orny quryldy
ASTANA. KAZINFORM — 2025 jyldyń 10 aıynda Shymkent qalasy makroekonomıkalyq kórsetkish boıynsha ósimi 14,8 paıyzdy qurap, respýblıka boıynsha aldyńǵy qatardan oryn aldy. Bul týraly Shymkent qalasynyń ákimi Ǵabıt Syzdyqbekov QR Prezıdenti janyndaǵy «Ortalyq kommýnıkatsııalar qyzmetiniń» baspasóz konferentsııasynda aıtty.
— Saýda kólemi 24,6%-ǵa, baılanys 18,3%-ǵa, ónerkásip ónimi 14,7%-ǵa, qurylys jumystary 7%-ǵa, ınvestıtsııa 4,7%-ǵa ósip, 982 myń sharshy metr turǵyn úı paıdalanýǵa berildi, — dep tolyqtyrdy Ǵabıt Syzdyqbekov.
Sonymen qatar, onyń aıtýynsha, ekonomıka ósiminiń draıveri óńdeý ónerkásibinde óndirilgen ónim kólemi ótken jyldyń sáıkes kezeńimen salystyrǵanda 16,5%-ǵa ósti. Sońǵy 3 jylda ónerkásip salasynda quny 150 mlrd teńgeni quraıtyn 40 joba iske qosylyp, 2,5 myńnan astam jumys orny quryldy.
— Megapolıste óndiristik aımaqtardy damytý arqyly ınvestorlar tartý jáne turaqty jumys oryndaryn qurý maqsatynda jańadan 2 óndiristik aımaq salý jáne 3 aımaqty keńeıtý jumystary júrgizilip jatyr. Bul aımaqtarda 900 mlrd teńgeni quraıtyn 300 ınvestıtsııalyq joba iske asyrylyp, 13 myńǵa jýyq jumys orny qurylady, — dedi Ǵabıt Syzdyqbekov baspasóz konferentsııasynda.
Óńir basshysy «QazAlpack» kompanııasy óndiretin alıýmınıı qutylaryna suranys artyp, eksport kóleminiń ulǵaıýyna baılanysty quny 30 mlrd teńgeni quraıtyn jobanyń ekinshi kezeńin iske qostyq. Zaýyt jylyna 2,2 mlrd dana alıýmınıı qutylaryn shyǵarady. Sonymen qatar ol jerde 112 myń turaqty jumys ornyn ashylǵanyn atap ótti.
Oǵan qosa 7,8 mlrd teńgege «Sauran Bricks» kompanııasy avtoklavty gazdalǵan beton óndiretin zaýyt jobasyn iske qosty. Zaýyt jylyna 300 myń tekshe metr gazdalǵan beton óndiredi. Kásiporynda 100-ge jýyq turaqty jumys oryndary quryldy.
Eske sala keteıik, Prezıdent Qasym-Jomart Toqaev sońǵy jyldary básekelestiktegi artyqshylyqtarymyzdy tolyq ashýǵa, ekonomıkalyq ósimniń tyń múmkindikterin tabýǵa, ınvestıtsııa tartýǵa jáne kásipkerlik bastamalardy yntalandyrýǵa baǵyt alǵanymyzdy aıtqan edi.