Shymkentte ishinde jolaýshysy bar lıft 12-shi qabattan qulap ketti
ShYMKENT. KAZINFORM – Shymkentte Qonaev dańǵylynda ornalasqan elıtaly turǵyn úı kesheninde tótenshe jaǵdaı tirkeldi. Іshinde jolaýshysy bar lıft 12-qabattan kenetten tómen qaraı quldılap, tek apattyq qaýipsizdik júıesiniń arqasynda ǵana toqtaǵan.
Áıel jetinshi qabat deńgeıinde evakýatsııalanyp, aýrýhanaǵa jetkizildi, dep habarlaıdy Kazinform agenttiginiń tilshisi.
Oqıǵa týraly habar «112» qutqarý qyzmetiniń pýltine túsken. Oqıǵa ornyna jedel-qutqarý jasaǵy jiberildi.
— Aldyn ala málimet boıynsha, 16 qabatty turǵyn úıdegi lıft belgisiz sebeptermen tómen qatty jyldamdyqpen qozǵala bastaǵan, — dep málimdedi Shymkent qalalyq Tótenshe jaǵdaılar departamentindegiler.
Avtomatty qaýipsizdik júıesiniń iske qosylýy kabınany jetinshi qabat deńgeıinde toqtatýǵa múmkindik berdi.
Zardap shekken áıeldi qutqarýshylar lıftten shyǵaryp, jedel medıtsınalyq járdem brıgadasyna tapsyrdy.
Qalalyq densaýlyq saqtaý basqarmasynyń málimetinshe, áıeldiń taban súıekteri men omyrtqasy synǵan.
— Naýqastyń jaǵdaıy ortasha aýyr dep baǵalanyp otyr. Ol dárigerlerdiń baqylaýynda, — dep habarlady vedomstvoda.
Osy ýaqytta áleýmettik jelilerde turǵyndar bul «Qazaqstan» turǵyn úı keshenindegi lıft jabdyǵynyń alǵashqy aqaýy emes ekenin jazyp jatyr. Jarııalanymdarda lıfttiń buǵan deıin de isten shyqqany, kótergish qurylǵynyń tehnıkalyq jaǵdaıyna qatysty syn aıtylǵan. Qazirgi tańda bul málimdemeler tekserilip jatyr.
Qaýipsizdik talaptaryna saı kelmeıtin jumystardy oryndaý deregi boıynsha polıtsııa qylmystyq is qozǵady.
— Oqıǵanyń mán-jaıyn anyqtaýǵa baǵyttalǵan tergeý sharalary júrgizilip jatyr. Tergeý qorytyndysy boıynsha protsessýaldyq sheshim qabyldanady, — dep málimdedi Shymkent qalalyq polıtsııa departament.
Osyǵan dıin eldegi lıftilerdiń 40 paıyzy jaramsyz ekeni týraly jazdyq.