Shymkentte sheteldikterdi zańsyz jumysqa tartqan 35 adamǵa aıyppul salyndy
ShYMKENT. KAZINFORM. Shymkentte Qazaqstannyń kóshi-qon salasyndaǵy zańnamasyn buzǵany úshin 264 shetel azamaty jaýapqa tartyldy. Sondaı-aq sheteldik jumys kúshin zańsyz paıdalanǵan 35 adamǵa aıyppul salyndy.
Polıtseıler quqyq buzýshylardy «Quqyqtyq tártip» profılaktıkalyq is-sharasy barysynda anyqtaǵan.
Aıta keteıik, qala aýmaǵynda zańsyz eńbek kóshi-qonyn boldyrmaý maqsatynda reıdtik is-sharalar júrip jatyr. Kóshi-qon polıtsııasynyń qyzmetkerleri sheteldik jumys kúshin paıdalanatyn barlyq qurylys obektilerin, zańdy tulǵalar men kásiporyndardy aralap tekserýde.
«Atalǵan jumystar barysynda Qazaqstan Respýblıkasynyń kóshi-qon salasyndaǵy zańnamasyn buzǵany úshin 264 shetel azamaty, olardy zańsyz turǵyn jaımen qamtamasyz etken 117 adam jaýapqa tartyldy. Sondaı-aq jergilikti atqarýshy organnyń ruqsatynsyz sheteldik jumys kúshin tartqany úshin 35 jumys berýshige ákimshilik aıyppul salyndy»,-dedi qalalyq Polıtsııa departamentindegiler.
Reıdtik is-sharalardan keıin sheteldik 54 azamat el aýmaǵynan shyǵaryldy. Kórsetilgen baǵyttaǵy jumystar aldaǵy ýaqytta da jalǵasyn tabady.
Eske salsaq, buǵan deıin Abaı oblysy Kýrchatov qalasy aýmaǵynda zańsyz júrgen Tájikstan Respýblıkasynyń eki azamaty anyqtalǵanyn jazǵan bolatynbyz. Sot sheshimimen ekeýi de memleket aýmaǵynan shyǵaryldy.