Shymkentte sheber ájeler kımeshek tigip jarysty
ShYMKENT. KAZINFORM – Shymkentte sheber analar forýmy aıasynda «Kesteli kımeshek» respýblıkalyq baıqaýy ótti. Memlekettik «Baqytty januıa» ortalyǵy janyndaǵy qalalyq Ájeler keńesi uıymdastyrǵan joba bıyl alǵash ret ótkizilip otyr.
Baıqaýǵa jergilikti sheber analardan bólek, Astana, Almaty, Qaraǵandy, Pavlodar, Taldyqorǵan qalalarynan Túrkistan oblysynan tipti Túrkııadan sheberler qatysty.
«Kesteli kımeshek» jobasynyń jetekshisi ári qalalyq Ájeler keńesiniń tóraǵasy Klara Áıtenova sheber analar forýmy Memleket basshysy Qasym-Jomart Toqaevtyń qatysýymen ótken «Adal adam – Adal eńbek - Adal tabys» atty ulttyq quryltaıdan keıin ata-babadan mura bolyp jetken ulttyq bas kıimdi dáripteý maqsatynda uıymdastyrylǵanyn atap ótti.
Kımeshek tigip jarysqan sheberlerdiń bir bóligi baıqaýǵa arnaıy ózderi kelip, ónerlerin pash etse, endi biri sý tasqynyna baılanysty offlaın formatta týyndylaryn usyndy. Sheberler ózderiniń jasaǵan týyndylaryn, qoldanylǵan mata túrleri men oıýlardy tanystyrdy. Jalpy sany 50-ge jýyq qatysýshy baq synaǵan jarysta kımeshektiń úsh túri usynyldy.
«Biz standart boıynsha kımeshektiń úsh túrin túsindirdik. Birinshisi – qyzyl jaq. Qyzyl tústi jippen kestelengen kımeshektiń bul túri 20 jastan 40 jastaǵy kelinshekterge arnalyp tigiledi. Ekinshisi – sary jaq. Altyndaı sary tústes jiptermen kómkerilip, oıýmen tigiledi. Ol 40-tan 60 jasqa deıingi analarǵa arnalǵan. Úshinshisi – aq kúmis jaq. Ózi aty aıtyp turǵandaı aq kúmis tústes oıýlarmen kómkeriledi. Bul 60-tan 80-100 jastaǵy ájelerge arnalǵan»,-dedi joba jetekshisi, qalalyq Ájeler keńesiniń tóraıymy Klara Áıtenova.
Joba jetekshisi qatysýshylarǵa kımeshekti tek ájeler kıedi degen uǵym durys emes, ár úıde keminde bir kımeshek bolýy kerektigin barynsha túsindirdik dep otyr.
Baıqaý qorytyndysy boıynsha qatysýshy sheberlerge arnaıy dıplomdar men demeýshi esebinen syılyqtar tabystaldy.
Uıymdastyrýshylar adaǵy ýaqytta kımeshekti qazaqtyń ulttyq bas kıimi dep ıÝNESKO deńgeıinde tanytýdy josparlap otyr.
