Shymkentte segiz jyl buryn bastalǵan A-2 avtomobıl jolynyń qurylysy qashan aıaqtalady

Jalpy uzyndyǵy 28 shaqyrymdyq magıstral qaladaǵy negizgi kólik aǵyndaryn retteýde mańyzdy ról atqarady. Ol arqyly eldiń ońtústik-shyǵys jáne batys óńirlerine, sondaı-aq Túrkistan oblysy baǵytyna tranzıttik júk tasymaly júzege asyrylady.

Shymkent qalasy jolaýshylar kóligi jáne avtomobıl joldary basqarmasynyń málimetinshe, 8 kezeńnen turatyn jobanyń qurylysy segiz jyl buryn bastalǵan.

— A-2 avtojolyn 6 jolaqty etip keńeıtý jumystary kezeń-kezeńimen júrgizilip keledi. Joba quny — 31,5 mlrd teńge. Qazirgi tańda 1, 2, 3, 4, 6 jáne 8-kezeńder paıdalanýǵa berildi. Al qalǵan 5 jáne 7-kezeńderdiń 14 shaqyrymynyń qurylysy jalǵasyp jatyr, — delingen basqarma usynǵan aqparatta.

Degenmen, kúre jol qurylysynyń keıbir ýchaskeleri kópten beri kólik qozǵalysy men jaıaý júrginshilerge qolaısyzdyq týǵyzyp otyr.

Turǵyndardyń aıtýynsha, Qazyǵurt jáne Qursaı shaǵynaýdandarynda qurylys qarqynynyń baıaýlaýy saldarynan kólik keptelisi jıilegen.

— Bul aýmaq arqyly jeńil kóliktermen qatar, negizinen tranzıttik aýyr júk kólikteri ótedi. Ásirese, Qazyǵurt shaǵynaýdanyndaǵy «Nur» dúkeni mańynda uzyn-sonar keptelis bolady. Bir jyldan astam ýaqyttan beri osyndaı jaǵdaı jalǵasyp keledi, — dedi turǵyn Talant Oralov.

Vedomstvo málimetinshe, turǵyndar jıi shaǵymdanyp jatqan atalǵan ýchaske — uzyndyǵy 6,2 shaqyrym bolatyn 5-kezeńge tıesili. Onyń qurylysy 2024 jyldyń mamyr aıynda bastalǵan.

— Qurylys barysynda birqatar qıyndyq týyndady. Jol boıyndaǵy zańsyz salynǵan nysandar jol negizin daıyndaý jumystaryna kedergi keltirdi. Olardyń qatarynda 3 turǵyn úı, 7 qorshaý jáne 1 avtoservıs nysany bar. Qazirgi tańda jumystardyń 50 paıyzy oryndaldy. Bir baǵytta 4 shaqyrym asfaltbeton jabyny tóselip, 2 shaqyrym aıaqjol salyndy. Jaryqtandyrý baǵanalary men ınjenerlik jeliler qaıta ornatyldy, — dedi basqarma ókilderi.

Sonymen qatar, Qazyǵurt jáne Qursaı shaǵynaýdandary turǵyndarynyń ótinishine sáıkes 7 orynda ýaqytsha aıaldama ornatylǵan. Ýaqytsha joldarda tegisteý jáne sý sebý jumystary turaqty túrde júrgizilip jatyr.

Ákimdik ókilderi aýqymdy jobanyń qurylysyn 2026 jyldyń sońyna deıin tolyq aıaqtap, paıdalanýǵa berý josparlanyp otyrǵanyn atap ótti.

— Turǵyndardan ýaqytsha qolaısyzdyqtarǵa túsinistikpen qaraýdy suraımyz. Barlyq shara qala turǵyndarynyń qaýipsiz ári jaıly qozǵalysyn qamtamasyz etýge baǵyttalǵan, — dep habarlady vedomstvo.

Budan buryn Shymkentte qurylysy baıaýlap turǵan jáne keptelisi kóbeıgen jol bóligi halyqty ábigerge salǵanyn jazǵan edik.