Shymkentte sibir jarasynyń úsh jaǵdaıy tirkeldi

ShYMKENT. KAZINFORM — Eki naýqas Shymkent turǵyny bolsa, bireýi Túrkistan oblysy Báıdibek aýdanynan kelgen. 

Shymkent qalasynda sibir jarasynyń zerthanalyq jolmen rastalǵan úsh jaǵdaıy anyqtaldy. Aýrýǵa shaldyqqandardyń biri — 14 jastaǵy bala, ekinshisi — jasóspirim, úshinshisi — eresek azamat.

Mamandardyń aıtýynsha, naýqastar aýrýdy Túrkistan oblysynda aýyl sharýashylyq maldaryn soıý jáne óńdeý jumystaryna qatysý barysynda juqtyrǵan. Soıylǵan sıyr, qoı jáne laq etin bólip, ishek-qarnyn tazalaý kezinde juqpaǵa shaldyqqan. Keıinnen olar Shymkentke kelip, medıtsınalyq kómekke júgingen.

— Naýqastarmen baılanysta bolǵan 15 adam medıtsınalyq baqylaýǵa alynǵan. Olardyń arasynda aýrý juqtyrý jaǵdaıy anyqtalǵan joq. Infektsııanyń taralýyn boldyrmaý maqsatynda tıisti qyzmettermen birlese keshendi epıdemıologııalyq jáne veterınarııalyq aldyn alý sharalary júrgizildi. Sibir jarasyna kúdik týdyrǵan iri jáne usaq mal eti arnaıy «Bekkarı» shuńqyryna tastalyp, joıyldy, — dedi Shymkent qalasy sanıtarııalyq-epıdemıologııalyq baqylaý departamenti basshysynyń orynbasary Aıgúl Turymbetova.

Qalada epıdemıologııalyq jáne veterınarlyq aldyn alý sharalary turaqty túrde júrgizilip keledi. Qaýipti topqa jatatyn 635 adamnyń 92,4 paıyzy sibir jarasyna qarsy vaktsınamen qamtylǵan.

Qazirgi tańda Shymkent aýmaǵynda sibir jarasy tirkelgen 8 statsıonarlyq núkte beton qorshaýlarmen belgilenip, turaqty baqylaýǵa alynǵan. Sondaı-aq, 9 mal qorymy da sanıtarlyq talaptarǵa saı qadaǵalanyp otyr.

Aıta keteıik, budan buryn Shymkentte Abaı aýdany ákimdiginiń ǵımaraty órtengenin jazǵan bolatynbyz.