Shymkentte sanıtarlyq talapty buzǵandarǵa 58 mln teńgege jýyq aıyppul salyndy

Shymkent qalasy sanıtarııalyq-epıdemıologııalyq baqylaý departamentiniń málimetinshe, ótken jyly qalada 61 nysan josparly túrde, al 175 nysan jospardan tys aryz-shaǵymdar negizinde tekserilgen.

Tekserý qorytyndysy boıynsha sanıtarlyq talapty buzǵandarǵa 288 ákimshilik shara qoldanylyp, 58 mln teńgege jýyq aıyppul salynǵan.

Departament basshysynyń orynbasary Aldarqul Ahmetovtyń aıtýynsha, anyqtalǵan kemshilikterdiń kóbi dezınfektsııalyq rejımniń buzylýy, nysandardy jýyp-tazalaý tártibiniń saqtalmaýy, jeke bas gıgıenasynyń talapqa saı bolmaýyna qatysty bolǵan.

Sonymen qatar dezınfektsııalyq eritindilerdiń sáıkessizdigi anyqtalyp, qyzmetkerlerdiń medıtsınalyq tekserýden ýaqytyly ótpeýi nemese merziminiń ótip ketýi jıi kezdesken.

— Byltyr barlyǵy 3179 ótinish tústi. Onyń 2899-y — jeke tulǵalardan. Turǵyndardyń basym bóligi qoǵamdyq tamaqtaný oryndaryna qatysty shaǵymdanǵan. Sondaı-aq saýda oryndary men jeke medıtsınalyq mekemelerge qatysty aryz-shaǵymdar da jıi tirkeldi, — dedi ol baspasóz máslıhatynda.

Spıkerdiń sózinshe, ótken jyly qalada taǵamnan ýlanýdyń 4 deregi tirkelgen.

— Barlyq jaǵdaı boıynsha jedel tekserý júrgizildi. Nátıjesinde 5 nysannyń qyzmetine qatysty materıaldar sotqa joldandy. Budan bólek, 15 nysannyń qyzmetin toqtatý týraly qaýly shyǵaryldy. Talapqa saı kelmeıtin bir azyq-túlik ónimi satylymnan alyndy. Medıtsınalyq tekserýden ótpegen 14 qyzmetker ýaqytsha jumystan shettetildi, — dedi Aldarqul Ahmetov.

Sonymen qatar monıtorıng barysynda qala aýmaǵynan atmosferalyq aýanyń 22 955 synamasy alynǵan. Onyń 48-inde shekti ruqsat etilgen kontsentratsııadan asý faktileri anyqtaldy. Atalǵan derekter boıynsha tıisti organdarǵa aqparat joldanyp, ekologııa salasy tarapynan ákimshilik sharalar qabyldanǵan.

Budan buryn Shymkent elimizdegi aýasy eń kóp lastanǵan 10 qalanyń qataryna engenin jazǵan edik.