Shymkentte 650 gramm salmaqpen týǵan náresteniń kózine kúrdeli ota jasaldy
ShYMKENT. KAZINFORM — Dárigerler birneshe aı boıy az salmaqta shala týǵan qyzdyń ómiri úshin kúresip, qaýipti kóz aýrýyn anyqtaǵan soń mıkrohırýrgııalyq operatsııa jasady.
Náreste byltyr qarasha aıynda júktiliktiń 25 aptasynda dúnıege kelgen, salmaǵy nebári 650 gramm. Dárigerler shala týǵan sábıdi reanımatsııaǵa aýystyryp, emdeýdi bastady.
Tekserý kezinde balaǵa retınopatııa dıagnozy qoıyldy. Bul shala týǵan balalarda jıi kezdesedi. Syrqatty ýaqytyly emdemese, kórý qabileti tolyq joǵalýy múmkin.
— Náreste óte az salmaqpen týǵan, sondyqtan ota óte dáldikti talap etti. Degenmen, operatsııa sátti ótti, — deıdi dárigerler.
Úsh aılyq sábıdiń qazirgi salmaǵy — 2 keli 400 gramm. Dárigerler náresteniń qalypty jaǵdaıda damyp kele jatqanyn aıtady. Qazirgi tańda náreste úıine shyǵaryldy. Ol turǵylyqty jeri boıynsha dárigerlerdiń baqylaýynda bolady.
Jyl basynan beri Shymkentte shala týǵan úsh sábıge retınopatııa syrqaty boıynsha ota jasalyp, barlyǵy sátti shyqqan.
Aıta keteıik, byltyr elimizde alǵash ret shala týǵan jáne jańa týǵan nárestelerdiń ómirin saqtaýǵa baǵyttalǵan joba iske qosyldy.
