Shymkentte retsıdıvıst 21 turǵyndy velosıpedsiz qaldyrdy

ShYMKENT. KAZINFORM –  Shymkentte buryn urlyq úshin sotty bolǵan jigit 21 turǵyndy velosıpedsiz qaldyrǵan. Keltirilgen shyǵynnyń jalpy somasy 2,5 mln teńgege jýyq.

Qalalyq Polıtsııa departamentindegiler jas jigit bul urlyq qylmystaryn birneshe aıda jasaǵan dep otyr. 

Tergeý materıaldaryna sáıkes, retsıdıvıst kópqabatty turǵyn úılerdiń kireberisine kirip, baspaldaq alańyna qoıylǵan velosıpedterdi urlaýmen aınalysqan. Al dóńgelekti qulyptaý qurylǵylaryn qysqyshpen kesip júrgen.

«Kúdiktini tártip saqshylary beınebaqylaý kameralarynyń kómegimen anyqtady. Ol buryn urlyq jasaǵany úshin sottalǵan qala turǵyny bolyp shyqty. Retsıdıvıst qamaýǵa alyndy.
Ál-Farabı APB tergeýshileri barlyq aıǵaqtardy jınap, qylmystyq isti sotqa joldady»,-dedi polıtsııadan.

Shymkenttiktiń kinási sotta dáleldense, oǵan 2 jyldan 7 jylǵa deıingi merzimge bas bostandyǵyn shekteý nemese sol merzimge bas bostandyǵynan aıyrý jazasy berilýi múmkin. 

Buǵan deıin Almaty áýejaıyndaǵy júkti ýaqytsha saqtaý qoımasynyń 29 jastaǵy jumysshysy jalpy somasy 7 mln teńgeden asatyn bótenniń múlkin urlaǵany úshin 3,6 jylǵa sottalǵany týraly jazdyq. 

Budan ózge Almatyda 24 jastaǵy jigit qala meshitterinde urlyq jasady degen kúdikpen ustalǵan bolatyn. Polıtsııa málimetinshe, onyń 7 qylmysqa qatysy bar.