Shymkentte respýblıkalyq olımpıadanyń qoǵamdyq-gýmanıtarlyq baǵyty boıynsha qorytyndy kezeńi bastaldy
ShYMKENT. KAZINFORM – Shymkent qalasynda jalpy bilim beretin pánderden 10-11 (12) synyp oqýshylaryna arnalǵan respýblıkalyq olımpıadanyń qoǵamdyq-gýmanıtarlyq baǵyty boıynsha qorytyndy kezeń bastaldy. Bul týraly Oqý-aǵartý mınıstrliginiń baspasóz qyzmeti habaralady.
Shymkent qalasyndaǵy Nº145 jalpy orta bilim beretin Keleshek mektebinde ótip jatqan is-shara sáýir aıynyń 13-i kúni qorytyndylanady. Bilim jarysy orys tili men ádebıeti, qazaq tilinde oqytatyn mektepterdegi orys tili men ádebıeti jáne quqyq negizderi pánderi boıynsha ótedi. Daryndy balalardy anyqtaý jáne olardyń ǵylymı áleýetin damytýǵa arnalǵan zııatkerlik baıqaýda elimizdiń barlyq óńirlerinen iriktelgen 272 oqýshy baq synaıdy. Atap aıtqanda, bilim báıgesine orys tili men ádebıetinen 87 oqýshy, qazaq tilinde oqytatyn mektepterdegi orys tili men ádebıetinen 92 qatysýshy, quqyq negizderinen 93 oqýshy qatysyp jatyr.
Oqýshylar tapsyrmalardy oryndaý arqyly ózderiniń ádebı taldaý, oılaý, shyǵarmashylyq jáne kommýnıkatsııa qabiletterin damytady. Sonymen qatar, quqyqtyq bilim negizderin ıgerip, zańdar men olardyń kúndelikti ómirde qoldanylýyn úırenedi.
Qatysýshylar úshin tarıhı-mádenı oryndarǵa ekskýrsııa, psıhologııalyq trenıngter jáne J. Shanın atyndaǵy Shymkent qalalyq akademııalyq qazaq drama teatrynda qoıylym tamashalaý uıymdastyrylady. Baǵdarlama oqýshylardyń bilimin tereńdetýmen qatar, olardyń jeke tulǵalyq damýyna, shyǵarmashylyq qabiletterin shyńdaýǵa jáne jańa tájirıbe jınaýǵa múmkindik beredi.
Aıta keteıik, bıyl jalpy bilim beretin pánder boıynsha respýblıkalyq olımpıadanyń qorytyndy kezeńi elimizdiń alty óńirinde ótýde. Qoǵamdyq-gýmanıtarlyq baǵyt boıynsha barlyǵy 720 oqýshy qatysýda. Taraz qalasynda ótkizilgen saıysta 270 oqýshy baq synap, olardyń 121-i júldeli oryndar ıelendi.
Buǵan deıin áskerı daıyndyq pániniń ataýy ózgerip, mazmuny jańaratynyn habarlaǵanbyz.
