Shymkentte respýblıkalyq aqyndar aıtysy ótedi
ShYMKENT. KAZINFORM – Shymkentte sońǵy 4-5 jyldan keıin alǵash ret respýblıkalyq aqyndar aıtysy ótedi.
Qalalyq mádenıet, tilderdi damytý, onomastıka jáne muraǵattar basqarmasynyń basshysy Baýyrjan Oryntaevtyń aıtýynsha, jergilikti aqyndar men aıtysty saǵynǵan halyqtyń suranysynan keıin osyndaı sheshim qabyldanǵan.
«Ózderińiz biletindeı, qalada aqyndar aıtysy ótkizilmegeli 4-5 jylǵa jýyq ýaqyt boldy. Aıtysty saǵynǵan halyqtyń suranysy boıynsha jáne jergilikti aqyndardyń usynysyna sáıkes bıyl respýblıka kóleminde aqyndar aıtysyn ótkizýdi josparlap otyrmyz»,-dedi basqarma basshysy Óńirlik kommýnıkatsııalar qyzmetinde ótken brıfıngte.
Spıkerdiń sózinshe, mamyr aıyndaǵy merekelerdi keńinen atap ótý eldegi sý tasqynyna baılanysty toqtatylyp, oǵan bólingen qarjy qysqartylǵan. Al basqa da merekelerge arnalǵan mádenı sharalar josparǵa sáıkes kezeń-kezeńimen ótetin bolady.
«Prezıdentimiz Qasym-Jomart Kemeluly Toqaevtyń «Egemen Qazaqstan» gazetine bergen suqbatynda ataýly datalarǵa keńinen kóńil bólgen bolatyn. Sonyń ishinde Joshy ulysy irgesiniń qalanǵanyna - 800 jyl, Kenen Ázirbaevtyń týǵanyna - 140 jyl, jazýshy Beıimbet Maılınniń 130 jyldyǵy, sýretshi Ábilhan Qasteevtiń 120 jyldyǵy, balalar jazýshysy Berdibek Soqpaqbaevtyń týǵanyna - 100 jyl, sonymen qatar halyq qaharmany Rahymjan Qoshqarbaevtyń týǵanyna 100 jyl tolýyna oraı aýqymdy is-sharalar ótkizýdi josparlap otyrmyz. Odan bólek, belgili aqyn, mádenıet salasynyń ardageri Hanbıbi Esenqaraqyzynyń 75 jyldyq mereıtoıyn atap ótý josparlanyp otyr»,-dedi Baýyrjan Oryntaev.
2024 jyldyń alǵashqy toqsanynda atqarylǵan jumystar týraly baıandaǵan basqarma basshysy teatr súıer qaýymy úshin jaǵymdy jańalyqta jarııa etti.
«Teatr súıer qaýym úshin qýanyshty jańalyqtarymyz da joq emes, sonyń ishinde bıyl elimizdegi birqatar beldi teatrr men Ózbekstan Respýblıkasynyń teatrlary Shymkent qalasyna gastroldik saparmen keledi»,-dedi ol.
Atap aıtar bolsaq, 5 mamyrda Almaty qalasynyń JOL teatry, 11-14 mamyrda Aqmola oblystyq orys drama teatry, 13-18 mamyr Ózbekstan Respýblıkasynyń Ferǵana, Andıjon oblystyq qýyrshaq teatrlary, 15-16 mamyrda Shyǵys Qazaqstan oblystyq drama teatry, 18 mamyr Ózbekstan Respýblıkasynyń Syrdarııa oblystyq mýzykalyq drama teatry Shymkent kórermenderine óz ónerlerin pash etetin bolady.