Shymkentte Reseıden zańsyz ákelingen 11 myńnan astam jumyrtqa joıyldy
ASTANA. KAZINFORM – Shymkentte Reseıden zańsyz ákelingen taýyq jumyrtqalarynyń iri partııasyn satý áreketiniń joly kesildi.
QR Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıteti, Shymkent qalasynyń Saýda jáne tutynýshylardyń quqyqtaryn qorǵaý departamenti jáne Qazaqstan qus ósirýshiler odaǵynyń birlesken tekserýi barysynda «Jibek joly» bazarynda zań buzýshylyq anyqtaldy.
Tekserý kezinde mindetti tańbalaýy joq jáne veterınarııalyq ilespe qujattarsyz satylymǵa shyǵarylǵan jumyrtqalar tárkilendi. Zańsyz ónimniń jalpy kólemi 11 850 danany qurady.
«Zerthanalyq saraptama nátıjeleri ónimniń qaýipsizdik talaptaryna jáne Qazaqstan Respýblıkasynyń qoldanystaǵy zańnamasyna sáıkes kelmeıtinin kórsetti. Osyǵan baılanysty jumyrtqalardyń barlyq partııasy arnaıy qurylǵan komıssııanyń qatysýymen belgilengen tártipke sáıkes joıyldy», – dep habarlady Qazaqstan qus ósirýshiler odaǵy.
Zań buzýshylyqqa jol bergen tulǵalarǵa qatysty ákimshilik is qozǵalyp, tekserý materıaldary tıisti protsessýaldyq sheshim qabyldaý úshin ýákiletti memlekettik organdarǵa joldandy.
Qazaqstan qus ósirýshiler odaǵy jumyrtqa ónimderiniń zańsyz aınalymynyń jolyn kesý baǵytyndaǵy jumystar memlekettik organdarmen birlesip jalǵasyp jatqanyn málimdedi. Anyqtalǵan barlyq zań buzýshylyqtar Aýyl sharýashylyǵy mınıstrligine, Saýda jáne ıntegratsııa mınıstrligine, Memlekettik kirister komıtetine jáne Sanıtarııalyq-epıdemıologııalyq baqylaý komıtetine jiberiledi.
«Qoldanystaǵy shekteý sharalaryna qaramastan, elimizdiń birqatar óńirlerinde Reseıden ákelingen tańbalanbaǵan jumyrtqalardy satý faktileri áli de tirkelýde. Osyǵan baılanysty memlekettik organdar respýblıka aýmaǵyndaǵy bazarlar men saýda nysandarynda júıeli tekserýler júrgizýdi jalǵastyryp keledi», – delingen habarlamada.
Aıta keteıik, Qostanaı oblysynda 24 tonna spırtti zańsyz tasymaldaǵan adam ustaldy.
