Shymkentte iri esirtki shemasyna qatysy bar 17 adam sottalyp, bireýi aqtaldy
ShYMKENT. KAZINFORM – Shymkent qalasynyń qylmystyq ister jónindegi aýdanaralyq sotynda 18 sottalýshyǵa qatysty qylmystyq is qaraldy.
Qalalyq sottyń málimetinshe, sottalýshylarǵa transulttyq uıymdasqan qylmystyq top qurý jáne oǵan qatysý, esirtki zattaryn asa iri mólsherde óndirý jáne ótkizý, zańsyz kásipkerlik, qylmystyq jolmen alynǵan kiristerdi zańdastyrý (jylystatý), sondaı-aq osy qylmystarǵa kómektesý aıyptary taǵylǵan.
Tergeý derekterine sáıkes, qylmystyq shema Qazaqstan aýmaǵynda ǵana emes, odan tys jerlerde de jumys istegen.
– Qazaqstan jáne irgeles memleketter aýmaǵynda psıhotroptyq zattardy óndirip, olardy vırtýaldy esirtki dúkenderi arqyly ótkizýmen aınalysqan transulttyq qylmystyq top áreket etken, – dep habarlady sot úkimin jarııalaý kezinde.
Sot anyqtaǵandaı, 2024 jyly top músheleriniń biri Shymkent qalasynda asa iri mólsherde psıhotroptyq zattar óndiretin zerthana uıymdastyrǵan. Onyń týysy men tanysy shıkizatty jasyrýǵa jáne qylmys izderin joıýǵa kómektesken.
Sondaı-aq eki sottalýshy 2022-2024 jyldary krıptovalıýta operatsııalary arqyly zańsyz kásipkerlikpen aınalysyp, esirtki saýdasynan túsken qarajatty zańdastyrǵan. Taǵy toǵyz adam ózderiniń bank kartalaryn usynyp, qarajatty qabyldaý men aýdarýǵa jaǵdaı jasap, qylmystyq kiristerdi jylystatýǵa yqpal etken.
Budan bólek, eki tulǵa adamdar tobymen aldyn ala sóz baılasý arqyly psıhotroptyq zattardy satqan. Taǵy bir sottalýshy krıptovalıýta satyp, alý-satýmen baılanysty zańsyz kásipkerlik qyzmetpen aınalysqan.
Memlekettik aıyptaýshy barlyq sottalýshylarǵa bas bostandyǵynan aıyrý jazasyn taǵaıyndaýdy surady. Qorǵaý tarapy aıyptalýshylardyń bir bóligin aqtaýdy jáne qalǵandaryna jeńilirek jaza taǵaıyndaýdy ótindi.
Sot dáleldemelerdi baǵalaı kele, sottalýshylardyń basym bóliginiń kinási kýálardyń aıǵaqtarymen, saraptama qorytyndylarymen, moıyndaý jaýaptarymen jáne ózge de is materıaldarymen dáleldengenin atap ótti.
– Sot úkimimen 17 adam Qylmystyq kodekstiń birqatar baby boıynsha kináli dep tanyldy. Esirtki zerthanasyn uıymdastyrýshy 16 jylǵa bas bostandyǵynan aıyryldy. Qalǵan sottalǵandarǵa 2,5 jyldan 11 jylǵa deıingi merzimge bas bostandyǵynan aıyrý jazasy taǵaıyndaldy, – delingen habarlamada.
Sondaı-aq eki sottalýshyǵa jazany óteý merzimi eki jylǵa keıinge qaldyryldy. Taǵy eki adamǵa 11 mln teńge kóleminde aıyppul salyndy. Bir sottalýshy kinási dáleldenbegendikten aqtaldy.
Úkim zańdy kúshine engen joq.
Budan buryn Almaty men Jetisý oblystarynan esirtki zerthanalary tabylǵanyn jazǵan edik.