Shymkentte psıhotroptyq zat daıyndaýǵa áreket jasaǵan adam 8 jylǵa sottaldy
ShYMKENT. KAZINFORM — Shymkent qalasynyń qylmystyq ister jónindegi mamandandyrylǵan aýdanaralyq sotynda asa aýyr qylmysqa qatysty úkim jarııalandy.
Sot materıaldaryna sáıkes, aıyptalýshy 2024 jyldyń qyrkúıek aıynda Telegram messendjeri arqyly belgisiz adammen sóılesip, jyldam paıda tabý maqsatynda psıhotroptyq zattardy zańsyz daıyndaýǵa kelisim jasaǵan. Ol Shymkent qalasynyń aýmaǵynan jer úıdi jalǵa alyp, Almaty qalasynan arnaıy prekýrsorlar men hımııalyq qospalar satyp ákelgen. Keıin jalǵa alǵan úı aýlasyndaǵy monshany zerthanaǵa aınaldyryp, asa iri mólsherdegi — jalpy salmaǵy 2 kılogramm 624,2 gramm bolatyn a-pırrolıdınovalerofenon (a-PVP) psıhotroptyq zatyn daıyndaý barysynda quqyq qorǵaý organdarynyń qyzmetkerleri ustaǵan.
Sot barysynda aıyptalýshynyń kinási tintý hattamalary, saraptama qorytyndylary, sondaı-aq óziniń kinásin moıyndaǵan jaýabymen tolyq dáleldendi. Prokýror sottan aıyptalýshyǵa bas bostandyǵynan aıyrý jazasyn taǵaıyndaýdy surady. Al sottalýshy jasaǵan qylmysyna ókinip, jeńil jaza qoldanýdy ótingen.
Úkim shyǵarý kezinde sot onyń buryn sotty bolmaǵanyn, asyraýynda jasóspirim balalary baryn jeńildetetin mán-jaı retinde nazarǵa aldy. Aýyrlatatyn mán-jaılar anyqtalǵan joq.
Nátıjesinde sot aıyptalýshyny kináli dep tanyp, 8 jyl 5 aı merzimge bas bostandyǵynan aıyrý jazasyn taǵaıyndady. Úkim zańdy kúshine endi.
Aıta keteıik, budan buryn Shymkenttegi munaı óńdeý zaýytynda avtokótergish aýdarylyp, eki adam qaza tapqanyn jazǵan bolatynbyz.