Shymkentte polıtsııany kóligimen qaǵyp, qashyp ketken júrgizýshige qylmystyq is qozǵaldy

TÚRKІSTAN. KAZINFORM - Kúdiktige qatysty qylmystyq is qozǵaldy, tártip buzýshy 12 jylǵa bas bostandyǵynan aıyrylýy múmkin, dep habarlaıdy Kazinform tilshisi.

Jumys barysynda júrgen polıtsııa qyzmetkerleri baǵdarshamnyń qyzyl túsine ótip, ereje buzǵan Toyota Highlander júrgizýshisin toqtatqan. Col ýaqytta 35 jastaǵy quqyq buzýshy ózin agressıvti ustap, ınspektordyń qujattardy kórsetý týraly zańdy talabyn oryndaýdan bas tartyp, oqıǵa ornynan boı tasalaýǵa árekettengen. 

- Qaýipti júrgizýshini toqtatý maqsatynda jáne basqa jol-kólik oqıǵalaryn boldyrmaý úshin ınspektor Baqytjan Boranbaı kóliktiń jolyn jaýyp tastady. Biraq er adam kóligin júrgizýdi jalǵastyryp, polıtseıdi basyp ótip, artynsha ony birneshe metrge súırep, keıin qashyp ketken», - dedi Shymkent qalalyq polıtsııa departamentiniń baspasóz qyzmeti usynǵan aqparatta. 

Kóp uzamaı kúdikti tabylyp, qamaýǵa alyndy. Medıtsınalyq kýálandyrý qorytyndysyna sáıkes, ol esirtkilik masań kúıde bolǵan.

Ustalǵan azamatqa qatysty qylmystyq is qozǵalyp, tergeý amaldary júrgizilip jatyr. 

- Júrgizýshi ýaqytsha ustaý ızolıatoryna qamaldy. Quqyq qorǵaý organy qyzmetkeriniń ómiri men densaýlyǵyna qaýip tóndirgeni úshin ol 12 jylǵa deıin bas bostandyǵynan aıyrylýy múmkin, - delingen polıtsııa aqparatynda.

Eske sala keteıik, buǵan deıin Oralda kólikti mas kúıde aıdaǵan 160-tan astam júrgizýshi sottalǵanyn jazǵan edik.