Shymkentte polıtsııadan kómek suraǵan qyzdarǵa tártip saqshysy tap bergen

Shymkentte patrýldik polıtsııadan kómek suraǵan qyzdarǵa polıtsııa dórekilik tanytqan. Bul sát qala kóshesindegi beınebaqylaý kamerasyna túsip qalǵan.

Vıdeo Instagram jelisinde jarııalandy.

Ondaǵy jazbaǵa súıensek, Túrkistan kóshesi boıynda ketip bara jatqan qyzdar eki jigit kúshtep ustap otyrǵan boıjetkendi baıqap qalǵan.

Ózderiniń aıtýynsha, kómek suraǵan qyzdyń jan daýysyn estip, beı-jaı qaraı almaǵan. Sóıtip dereý polıtsııaǵa habarlasqan.

Alaıda osydan keıin qyzdarǵa beıtanys baılanys nómirinen bireý habarlasyp, polıtsııa ýchaskesine kelýdi aıtypty. 

Sál keıinirek oqıǵa ornyna polıtsııa formasyn kıgen er adam kelgen.

Ol ózin tanystyrmaǵan, tipti qyzmettiń kýáligin de kórsetpegen.

Bul polıtsııa shaqyrǵan qyzdardyń boıynda kúdik týǵyzyp, olar mán-jaıdy vıdeoǵa túsirmek bolǵan.

Alaıda buǵan tártip saqshysy ashýlanyp, qyzdyń qolyndaǵy telefondy tartyp almaq bolady. 

Keıinirek belgili bolǵandaı, aınalasyndaǵylardan kómek suraǵan jas qyzdy baýyrlary kúshtep ustap otyrǵan. 

Aǵalary qyzdy anasyna jetkizbek bolypty. 

Qyzdyń aıtýynsha, oǵan anasy qorlyq kórsetetin kórinedi. 

Boıjetken aryz jazbaq bolǵanda oǵan beıtanys nómirden bireý máseleni «jaqsylyqpen» sheshýdi aıtypty.

Qalalyq polıtsııa departamenti vıdeodaǵy tártip saqshysyna qatysty qyzmettik tekserý bastalǵanyn habarlady. 

Oqıǵanyń mán-jaıy anyqtalyp jatyr.