Shymkentte polıtsııa basqarmasynyń burynǵy bastyǵy para alǵany úshin sottaldy
ShYMKENT. KAZINFORM — Sot polıtsııanyń joǵary laýazymdy qyzmetkerin para alý isi boıynsha kináli dep tanydy. Nurjan Tileýov bas bostandyǵynan aıyrylyp, arnaýly ataǵy qaıtarylyp alyndy. Úkim ázirge zańdy kúshine engen joq.
Qylmystyq ister jónindegi mamandandyrylǵan aýdanaralyq sotta Turan aýdany polıtsııa basqarmasynyń burynǵy bastyǵyna qatysty atyshýly is boıynsha úkim jarııalandy. Aıyptalýshylar oryndyǵynda Nurjan Tileýov otyrdy. Ol QR Qylmystyq kodeksiniń 366-babynyń 2-bóligi boıynsha para aldy dep aıyptalǵan.
Sot anyqtaǵandaı, Shymkent qalasy polıtsııa departamentinde basshylyq qyzmet atqara otyryp, Tileýov ózi basqarǵan bólimsheniń óndirisindegi qylmystyq is aıasynda qyzmettik ókilettigin paıdalanǵan.
Azamat A.-ǵa qatysty qylmystyń saralanýyn jeńildetý úshin ol 6 mıllıon teńge alǵan.
— Aıyptalýshynyń kinási kýágerlerdiń aıǵaqtarymen, jasyryn tergeý áreketteriniń nátıjelerimen, sot saraptamalarynyń qorytyndylarymen, zattaı dáleldemelermen jáne is materıaldarymen tolyq dáleldendi, — dedi úkimdi jarııalaý kezinde sýdıa Aınel Oraqbaeva.
Memlekettik aıyptaýshy alty jylǵa bas bostandyǵynan aıyryp, memlekettik qyzmette laýazym atqarý quqyǵynan ómir boıyna aıyrýdy suraǵan. Aıyptalýshy óz kinásin moıyndamaı, jaýap berýden bas tartty jáne sottan aqtaý úkimin shyǵarýdy ótindi.
Jaza taǵaıyndaý kezinde sot jeńildetetin mán-jaılardyń joq ekenin, al aýyrlatatyn mán-jaı retinde qabyldanǵan antty buzýdy atap ótti.
Nátıjesinde Nurjan Tileýov kináli dep tanylyp, alty jylǵa bas bostandyǵynan aıyryldy.
Sonymen qatar QR Qylmystyq kodeksiniń 49-babyna sáıkes, ol arnaýly ataǵynan aıyryldy.
Sot úkimi zańdy kúshine engen joq.
Eske sala keteıik, aýdandyq polıtsııa basqarmasynyń basshylyǵyna qatysty sotqa deıingi tergeýdi Ulttyq qaýipsizdik komıteti bastaǵan. Ol kezde advokat Talǵat Esimov Shymkent tájirıbesinde aýdandyq polıtsııa basqarmasynyń basshysyn ustaý buryn-sońdy bolmaǵan jaǵdaı ekenin jáne bul UQK janyndaǵy sybaılas jemqorlyqqa qarsy qyzmet jumysynyń jańa deńgeıin kórsetetinin atap ótken edi.