Shymkentte polıtsııa basqarmasynyń burynǵy bastyǵy alaıaqtyq jáne jemqorlyq úshin sottaldy
ShYMKENT. KAZINFORM – Shymkent qalasynyń qylmystyq ister jónindegi mamandandyrylǵan aýdanaralyq soty ál-Farabı aýdandyq polıtsııa basqarmasynyń burynǵy bastyǵy Batyr Myrzakeldıev pen onyń sybaılasyna qatysty úkim shyǵardy.
Sot málimetinshe, Batyr Myrzakeldıev alaıaqtyq jáne sybaılas jemqorlyq qylmystary boıynsha kináli dep tanylyp, 6 jylǵa bas bostandyǵynan aıyryldy. Onyń sybaılasy Bekmuratovqa 3 jyl 6 aı merzimge bas bostandyǵynan aıyrý jazasy kesildi.
Sondaı-aq Batyr Myrzakeldıev polıtsııa polkovnıgi arnaıy ataǵynan aıyrylyp, oǵan ómir boıy memlekettik qyzmette laýazym atqarýǵa tyıym salyndy.
UQK-niń Sybaılas jemqorlyqqa qarsy is-qımyl qyzmetiniń qyzmetkerleri 2025 jyldyń jeltoqsan aıynda Batyr Myrzakeldıevti 15 mln teńgeni alý kezinde ustaǵan bolatyn.
Tergeý málimeti boıynsha, bul aqsha qylmystyq isti toqtatqany úshin berilgen. Tergeý barysynda qorǵaý tarapy aıypty joqqa shyǵaryp, bul áreket arandatýshylyq bolǵanyn málimdegen.
Sot is materıaldaryn qarap, aıyptaý úkimin shyǵarýǵa jetkilikti dálelder bar dep tanydy.
– Shymkent qalasynyń qylmystyq ister jónindegi mamandandyrylǵan aýdanaralyq sotynyń 2026 jylǵy 21 shildedegi úkimimen Myrzakeldıev B.E. jáne onyń sybaılasy Bekmuratov A.S. kináli dep tanyldy. Olarǵa 6 jyl jáne 3 jyl 6 aı merzimge bas bostandyǵynan aıyrý jazasy taǵaıyndaldy, – dep habarlady sot.
Úkim zańdy kúshine engen joq.
Eske sala keteıik, buǵan deıin Shymkentte Turan aýdandyq polıtsııa basqarmasynyń burynǵy bastyǵy Nurjan Tileýov te para alǵany úshin 6 jylǵa sottalyp, arnaıy ataǵynan aıyrylǵan bolatyn.
