Shymkentte polıtseılerden aqsha bopsalaǵan bloger men eki sybaılasy sottaldy

ShYMKENT. KAZINFORM – Shymkentte áleýmettik jelide «Asko» laqap atymen tanymal bloger Asqat Balqybaev pen onyń eki sybaılasyna qatysty sot úkimi shyqty. Úsheýi de adamdar tobynyń aldyn ala sóz baılasýymen jasalǵan bopsalaý qylmysy úshin kináli dep tanylyp, árqaısysy 4 jyl 6 aıǵa bas bostandyǵynan aıyryldy.

Shymkentte polıtseılerden aqsha bopsalaǵan bloger men eki sybaılasy sottaldy
Foto: Kazinform\JI

Úkimdi Shymkenttiń qylmystyq ister jónindegi aýdanaralyq sotynyń sýdıasy Ashat Esenov jarııalady. Sottalýshylar qatarynda Asqat Balqybaevpen birge Ahmadalı Saıdahmetov pen Alıhan Serik boldy.

Sot anyqtaǵandaı, bloger Instagram, TikTok jáne YouTube áleýmettik jelilerinde memlekettik qyzmetshiler men polıtsııa qyzmetkerleriniń zańbuzýshylyqtary týraly materıaldar jarııalap kelgen. Onyń Instagram paraqshasyna shamamen 146 myń adam jazylǵan. 

Sot málimetinshe, sottalýshylar blogerdiń áleýmettik jelidegi tanymaldylyǵyn adamdarǵa qysym kórsetý jáne áshkereleıtin materıaldardy jarııalaımyz dep qorqytý maqsatynda paıdalanǵan.

Іs aıasynda Shymkent qalasynyń eki patrýldik polıtsııa qyzmetkerine qatysty bopsalaý deregi qaraldy. 23 maýsym kúni tańerteńgi ýaqytta túngi kezekshilik kezinde qyzmettik kólikte otyrǵan polıtseıler vıdeoǵa túsirilgen. Sot anyqtaǵandaı, túsirilim júrgizgen azamat sottalýshylardyń qylmystyq nıetinen habarsyz bolǵan.

Keıin beınejazba olardyń sybaılastarynyń qolyna túsken. Olar vıdeony Balqybaevtyń paraqshasyna jarııalaımyz dep qorqytyp, polıtseılerden aqsha talap etken. Aqshany berý merzimine qaraı talap etilgen soma 200 myńnan 1 mln teńgege deıin bolǵan.

Qorqytýdyń shyn máninde ekenin kórsetý maqsatynda blogerdiń paraqshasynda polıtseıler beınelengen vıdeonyń bir kadry «Ekeýi birden, eto kak» degen kekesindi jazbamen jarııalanǵan. Keıin Balqybaev deldalmen kezdesip, 500 myń teńge talap etken. Sonymen qatar ol Saıdahmetovtiń tanysyn mas kúıinde kólik basqarǵany úshin ákimshilik jaýapkershilikten bosatýǵa kómektesýdi kózdegen.

Jábirlenýshilerdiń aryzynan keıin quqyq qorǵaý organdary jasyryn tergeý áreketterin júrgizgen. Sot anyqtaǵan derekterge sáıkes, 1 shildede Balqybaev deldal arqyly 500 myń teńge alǵan.

Budan bólek, is boıynsha taǵy bir bopsalaý deregi qaraldy. Úsh azamat mas kúıinde kólik basqarǵan júrgizýshini ákimshilik jaýapkershilikten qutqarýǵa ýáde berip, odan 1 mln teńge alǵan. Alǵashynda 300 myń teńge, keıin taǵy 700 myń teńge berilgen.

Alaıda olar ýádelerin oryndamaǵan. Júrgizýshi ákimshilik jaýapkershilikke tartylyp, keıin bergen aqshasynyń bir bóligi qaıtarylǵan.

Sot otyrysynda aıyptalýshylar kinálaryn ishinara moıyndaǵanymen, bopsalaý derekterine qatysty aıyptaýlarmen kelispedi. Balqybaev polıtseılerdi vıdeoǵa túsirýge tapsyrma bermegenin jáne bastapqyda jarııalamaý úshin aqsha talap etý nıeti bolmaǵanyn aıtty. Qalǵan eki sottalýshy da taǵylǵan aıyptardyń bir bóligin joqqa shyǵardy.

Jábirlenýshiler men kýálardyń aıǵaqtaryn, áńgimelerdiń aýdıojazbalaryn, jasyryn tergeý áreketteriniń nátıjeleri men saraptama qorytyndylaryn zerdelegen sot er adamdardyń aldyn ala kelisip, árqaısysy ózara rólderdi bólisip áreket etken degen qorytyndyǵa keldi.

Osylaısha, úsheýi de QR Qylmystyq kodeksiniń 194-baby 2-bóliginiń 2-tarmaǵy boıynsha, ıaǵnı adamdar tobynyń aldyn ala sóz baılasýymen jasalǵan bopsalaý qylmysy úshin kináli dep tanyldy.

Buǵan deıin sottalýshylarǵa alaıaqtyq jasady degen aıyp ta taǵylǵan. Alaıda jábirlenýshilermen tatýlasýyna baılanysty bul epızodtar boıynsha qylmystyq is QR Qylmystyq kodeksiniń 68-baby negizinde toqtatyldy. Atalǵan aıyptar boıynsha bas bostandyǵynan aıyrý jazasy taǵaıyndalmady.

Jaza taǵaıyndaý kezinde sot ár sottalýshynyń kámeletke tolmaǵan balalary bar ekenin eskerdi. Sonymen qatar jaýaptylyqty aýyrlatatyn mán-jaılar anyqtalmady. Soǵan qaramastan sot naqty bas bostandyǵynan aıyrý jazasyn taǵaıyndaýdy qajet dep tapty.

Asqat Balqybaev, Ahmadalı Saıdahmetov jáne Alıhan Serik ortasha qaýipsizdik deńgeıindegi mekemede 4 jyl 6 aı jazasyn óteıdi. Sot múlkin tárkileýge negiz joq dep tanyp, bul jazany qoldanbady.

Budan bólek, sottalǵandardyń árqaısysyna bes jyl merzimge medıa salasynda qyzmet atqarýǵa tyıym salyndy. Mundaı sheshim qabyldaýǵa qylmys jasaý kezinde áleýmettik jelilerdiń paıdalanylǵany negiz bolǵan.

Sot úkimi zańdy kúshine engenge deıin úsheýi de qamaýda bolady. 2026 jylǵy 2 shildeden bastap qamaýda otyrǵan ýaqyty jaza merzimine bir kúnge bir jarym kún esebimen esepteledi.

Sot eki patrýldik polıtsııa qyzmetkeriniń azamattyq talaptaryn ishinara qanaǵattandyrdy. Ár jábirlenýshige moraldyq zııan úshin 1,5 mln teńgeden ótemaqy taǵaıyndaldy. Jalpy somasy 3 mln teńge sottalǵandardan ortaq tártippen óndiriletin boldy.

Sot úkimi ázirge zańdy kúshine engen joq. Oǵan apellıatsııalyq tártippen shaǵym túsirýge bolady.

Eske salaıyq, shilde aıynyń basynda Shymkent qalalyq polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jergilikti bloger men onyń sybaılastaryn ustaǵan edi. Olar bedelge nuqsan keltiretin beınejazbalardy jarııalaımyz dep qorqytyp, aqsha bopsalady degen kúdikke ilingen. Kúdiktiler qoǵamdyq baqylaý júrgizý jeleýimen túrli zańbuzýshylyqtardy beınejazbaǵa túsirip, keıin bul materıaldardy azamattarǵa qysym kórsetý úshin paıdalanǵan.