Shymkentte plastıkalyq hırýrgııaǵa qatysty 4 zańbuzýshylyq anyqtaldy
ShYMKENT. KAZINFORM – Shymkentte plastıkalyq hırýrgııa qyzmetin kórsetetin medıtsınalyq uıymdarǵa júrgizilgen tekserý barysynda birqatar zań buzýshylyq anyqtaldy.
Qazirgi tańda Shymkentte plastıkalyq hırýrgııa qyzmetin kórsetetin 13 medıtsınalyq uıym bar.
Medıtsınalyq jáne farmatsevtıkalyq baqylaý komıteti Shymkent qalasy boıynsha departamentiniń málimetinshe, 2026 jyldyń alǵashqy alty aıynda plastıkalyq hırýrgııa beıinindegi medıtsınalyq mekemelerge qatysty 8 jospardan tys tekserý júrgizilgen.
– Tekserý barysynda Qazaqstan Respýblıkasynda hırýrgııalyq kómek kórsetý standarty men Densaýlyq saqtaý mınıstrliginiń klınıkalyq hattamalary talaptarynyń buzylǵany anyqtaldy. Sondaı-aq lıtsenzııasyz medıtsınalyq kómek kórsetýdiń 2 jaǵdaıy jáne sertıfıkatsyz qyzmet kórsetýdiń 2 deregi tirkeldi. Budan bólek 1 medıtsınalyq uıym mindetti saqtandyrý shartyn jasasý talaptaryn buzǵany úshin ákimshilik jaýapkershilikke tartyldy, – delingen departamenttiń Kazinform tilshisine bergen jaýabynda.
Sondaı-aq plastıkalyq hırýrgııa qyzmetin kórsetetin medıtsınalyq uıymdardyń qyzmetine memlekettik baqylaýdy kúsheıtý maqsatynda prokýratýramen birlesip, qaladaǵy 4 mekemege jospardan tys tekserýler júrgizildi.
– Shymkent qalasy prokýratýrasynyń tapsyrmasy negizinde júrgizilgen tekserý nátıjesinde 1 uıymnyń jumys istemeıtini anyqtaldy, bir uıym boıynsha zań buzýshylyq tirkelmedi. Al 2 medıtsınalyq uıymǵa qatysty Ákimshilik quqyq buzýshylyq týraly kodeksiniń 230 jáne 426-baptary boıynsha ákimshilik sharalar qoldanyldy, – delingen jaýapta.
Aıta keteıik, plastıkalyq hırýrgııa baǵyty boıynsha alty aıda departamentke túsken 18 ótinish qaralǵan.
Buǵan deıin Shymkentte dárihanalardaǵy egý bólmelerinde 4 adam qaıtys bolǵany týraly habarlaǵan edik.
