Shymkentte perınataldyq ortalyq pen jańa ushý jolaǵyn salýǵa 33,5 mlrd teńge bólindi
ShYMKENT. KAZINFORM — Úkimet Memleket basshysy Qasym-Jomart Toqaevtyń Quryltaıdyń alǵashqy sessııasynda bergen tapsyrmalaryn oryndaý aıasynda óńirlerdegi áleýmettik ınfraqurylymdy damytý boıynsha sharalar qabyldap jatyr. Bul týraly Úkimettiń baspasóz qyzmeti habarlady.
Shymkentte jańa perınataldyq ortalyq pen halyqaralyq áýejaıdyń ekinshi ushý-qoný jolaǵyn salý jobalary júzege asyrylýda. Nysandardyń qurylysyn jalǵastyrýǵa qosymsha 33,5 mlrd teńge bólindi. Onyń ishinde densaýlyq saqtaý nysanyna – 10 mlrd teńge, al ekinshi ushý-qoný jolaǵyna 23,5 mlrd teńge baǵyttaldy.
Aqjaıyq shaǵyn aýdanynda 200 tósek-orynǵa arnalǵan jańa perınataldyq ortalyq salynýda. Medıtsınalyq mekeme jylyna 7 myń bosanýǵa arnalǵan jáne ana men jańa týǵan nárestelerge medıtsınalyq kómektiń tolyq tsıklin qamtamasyz etedi. Akýsherlik, gınekologııa jáne neonatologııa bólimderimen qatar, munda kúrdeli patologııalary bar jańa týǵan nárestelerge em júrgizýge arnalǵan neonataldyq hırýrgııa qyzmeti uıymdastyrylady. Sondaı-aq dıagnostıkalyq zerthana, genetıkalyq zertteýler júrgizýge arnalǵan baza, konsýltatsııalyq jáne ońaltý bólimsheleri qarastyrylǵan.
Nysandy paıdalanýǵa berý tósek-oryn qoryn ulǵaıtýǵa, qoldanystaǵy klınıkalarǵa túsetin júktemeni azaıtýǵa, akýsherlik jáne neonataldyq qyzmetterdiń qýatyn arttyrýǵa, sondaı-aq joǵary qaýip tobyndaǵy júkti áıelderdi qosa alǵanda, mamandandyrylǵan medıtsınalyq kómektiń qoljetimdiligin arttyrýǵa múmkindik beredi. Joba aıasynda shamamen 800–1000 jumys ornyn ashý josparlanyp otyr. Qurylys jumystary bıyl qańtardyń sońynda bastaldy.
Jańa ortalyqtyń salynýy megapolıs halqynyń ósýi men bala týý kórsetkishiniń joǵary bolýyna baılanysty qajet bolyp otyr. Jyl saıyn Shymkentte 30 myńnan astam sábı dúnıege keledi, qazirgi tańda bosaný kezinde medıtsınalyq kómekti tórt medıtsınalyq uıym kórsetedi.
Sondaı-aq Shymkentte 2025 jylǵy qazan aıynan beri halyqaralyq áýejaıdyń ekinshi ushý-qoný jolaǵynyń qurylysy jalǵasyp jatyr. Jańa ushý-qoný jolaǵynyń uzyndyǵy 3 900 metr, eni 75 metr bolmaq. Ol zamanaýı jaryq sıgnal berý jabdyqtarymen jaraqtandyrylyp, halyqaralyq standarttar talaptaryna sáıkes keledi. Bul kúrdeli meteorologııalyq jaǵdaılar men kóriný múmkindigi shekteýli kezde áýe kemelerin qabyldaýǵa múmkindik beredi.
Qurylys jumystarynyń qajettiligi qoldanystaǵy ushý-qoný jolaǵynyń jaǵdaıyna baılanysty týyndap otyr. Oǵan kúrdeli jóndeý jumystary 2007 jyly júrgizilgen, al kezekti jóndeý 2027 jyly qajet. Ony júrgizý áýejaı jumysyn uzaq ýaqytqa toqtatýǵa alyp keler edi. Budan bólek, qoldanystaǵy jolaq Qazaqstannyń avıatsııalyq ákimshiliginiń nusqamasyna sáıkes uzartýdy talap etedi. Jobany júzege asyrý áýejaı ınfraqurylymyn odan ári damytý kezeńinde onyń úzdiksiz jumys isteýin qamtamasyz etýge, aýyr júk tasymaldaýshy jáne jolaýshy ushaqtaryn qabyldaý múmkindigin arttyrýǵa, halyqaralyq júk tasymaldaryn keńeıtýge jáne Shymkenttiń tranzıttik áleýetin kúsheıtýge múmkindik beredi. Avıatsııalyq ınfraqurylymdy damytý Memleket basshysynyń Qazaqstandy Eýrazııanyń jetekshi avıatsııalyq habyna aınaldyrý, áýe habtardy belsendi damytý jáne olardy jahandyq logıstıkalyq tizbekterge ıntegratsııalaý jónindegi tapsyrmalaryna sáıkes júzege asyrylyp jatyr.
Jalpy, atalǵan qurylys jobalaryn júzege asyrý óńir turǵyndary úshin medıtsınalyq jáne kólik qyzmetteriniń qoljetimdiligin keńeıtýge, olardyń sapasyn arttyrýǵa jáne halyqtyń turmys jaǵdaıyn jaqsartýǵa yqpal etedi.
Aıta ketelik, Qazaqstanda merdigerlerdi baqylaý kúsheıetini týraly jazǵan edik.
