Shymkentte páterden eki balanyń máıiti tabyldy
ShYMKENT. KAZINFORM — Shymkenttegi kópqabatty úılerdiń birindegi páterde eki bala kóz jumdy. Polıtsııanyń aldyn ala málimetinshe, balalardyń ólimine gazdan ýlaný sebep bolǵan. Atalǵan fakti boıynsha qylmystyq is qozǵaldy.
Qaıǵyly oqıǵa 19 qazanda Kúnshyǵys shaǵynaýdanynda bolǵan. Aldyn ala málimetke qaraǵanda, eki otbasy jaldap turǵan páterden 15 jastaǵy qyz ben tórt jasar balanyń máıiti tabyldy. Taǵy bir bala men onyń anasy aýrýhanaǵa jetkizildi.
Gıperbarııalyq oksıgenatsııa ortalyǵynyń bas dárigeri Madına Ermahanbetovanyń aıtýynsha, 27 jastaǵy áıeldiń jaǵdaıy jaqsaryp, toksıkologııa bólimine aýystyrylǵan. Al onyń úsh jasar qyzy jansaqtaý bóliminde jatyr. Dárigerler balanyń jaǵdaıy jaqsaryp kele jatqanyn aıtty.
Shymkent qalalyq polıtsııa departamenti kámeletke tolmaǵan eki balanyń qaıtys bolǵanyn rastady. Atalǵan derek boıynsha sotqa deıingi tergep-tekserý bastalǵan.
— Shymkenttegi páterlerdiń birinde eki kámeletke tolmaǵan balanyń qaza tabýyna baılanysty qaýipsizdik talaptaryna saı kelmeıtin jumystardy oryndaý nemese qyzmetter kórsetý saldarynan abaısyzda adam ólimine ákep soqqan fakti boıynsha qylmystyq is qozǵaldy. Aldyn ala málimet boıynsha, ólimge gaz ıisinen ýlaný sebep bolǵan. Qazirgi ýaqytta oqıǵanyń barlyq mán-jaıyn jan-jaqty ári tolyq anyqtaýǵa baǵyttalǵan qajetti tergeý amaldary júrgizilip jatyr, — dep habarlady polıtsııa.
Oqıǵadan keıin páterdi gaz qyzmetiniń mamandary teksergen. QazaqGaz Aimaq AQ Shymkent óndiristik fılıalynyń óndiristik-tehnıkalyq bóliminiń bastyǵy Nurbek Rahmanov tekserý nátıjeleri týraly aıtty.
— Apattyq qyzmet mamandary oqıǵa ornyna baryp, tekserý júrgizgen kezde ıis gazynyń mólsheri anyqtalmady. Qazir ýákiletti organdar tergeý júrgizip jatyr. Oqıǵanyń naqty sebepteri tergeý nátıjesinde belgili bolady. Bul úı gaz plıtalaryn paıdalanýǵa arnalǵan. Alaıda páterge qosymsha gazben jumys isteıtin sý jylytqysh ornatylǵan. Mundaı úılerde bul jabdyqty ornatý qarastyrylmaǵan, — dedi Nurbek Rahmanov.
Páterge ornatylǵan gazben jumys isteıtin sý jylytqyshtyń balalardyń ólimine qatysy bar-joǵyn tergeý anyqtaıdy.
Aıta keteıik, buǵan deıin Shymkent qalasynyń osy Kúnshyǵys shaǵynaýdanynda úsh adamnyń qaza tapqany týraly habarlaǵan edik. Aqpan aıynda páterlerdiń birinen áıeldiń, onyń uly men ájesiniń máıitteri tabylǵan. Ol kezde de ólimniń aldyn ala sebebi gazdan ýlaný dep boljanǵan.
