Shymkentte ózbek etnosy kúni toılandy
ShYMKENT. KAZINFORM – Qazaqstan halqy Assambleıasynyń 30 jyldyǵy aıasynda Shymkent qalasyndaǵy Ortalyq saıabaqta Qazaqstan Respýblıkasy ózbekteri etnomádenı birlestikteri «Dўstlık» qaýymdastyǵynyń uıymdastyrýymen «Ózbek etnosynyń tili, mádenıeti jáne salt-dástúri kúni» keńinen atalyp ótti.
Merekelik sharanyń shymyldyǵy Shymkent qalalyq ózbek drama teatry ártisteriniń Abaı men Álisher Naýaı beınelerin somdaǵan erekshe sahnalyq kórinisimen ashylyp, qonaqtar ulttyq qundylyqtardy aıshyqtaǵan kórmelerdi tamashalady.
Іs-sharaǵa QR Parlamenti Senatynyń depýtaty Alısher Satvaldıev, QR Prezıdenti Ákimshiligi Qazaqstan halqy Assambleıasy Hatshylyǵynyń sektor meńgerýshisi Qaırat Baımoldınov, Ózbekstan Respýblıkasynyń Qazaqstandaǵy Tótenshe jáne Ókiletti Elshisi Bahtıer Ibragımov, «Dўstlık» qaýymdastyǵynyń tóraǵasy Ikramjan Hashımjanov, Shymkent qalasy Іshki saıasat jáne jastar isteri jónindegi basqarma basshysynyń m.a. Zańǵarbek Ýsýpahmetov, Shymkent qalasynyń «Qoǵamdyq kelisim» KMM basshysy Núrken Álimqulov, Shymkent qalalyq ózbek etnomádenı birlestiginiń tóraǵasy Tahırbek Nıshanbaev jáne qoǵam belsendileri qatysty.
Kontserttik baǵdarlama Memlekettik Ánuranmen bastalyp, teatr ártisteriniń «Qosh keldińiz» kompozıtsııasymen jalǵasty. Mýkımı atyndaǵy №13 mekteptiń «Bahor» bı ansambli ózbek halqynyń ulttyq «Shodlık» bıin jáne qazaq bıin tartý etti. Shymkent qalalyq drama teatry «Sary Jaılaý» kompozıtsııasyn sahnalap, kórermenniń ystyq yqylasyna bólense, qalalyq opera jáne balet teatrynyń ánshisi Nematılla Zıkrıllaev Tólegen Muhamedjanovtyń «Otan» jáne A.Zatsepınniń «Tyńda» ánderin oryndap, merekeniń sánin keltirdi. Sondaı-aq teatr ártisi Shahısta Ýsmanova ózbek halqynyń ásem áýeni – «Mýstahzod» ánin shyrqady.
Merekelik jıyn barysynda birqatar azamattar etnomádenı baılanystardy nyǵaıtýǵa qosqan úlesi úshin marapattaldy.