Shymkentte óz balasyn pyshaqtap óltirgen áke májbúrlep emdeletin boldy
ShYMKENT. KAZINFORM. Shymkentte otbasylyq janjal kezinde óz balasyn pyshaqtap óltirgen er adam psıhıatrııalyq statsıonarda májúrli túrde emdeletin boldy.
Qylmystyq is Shymkent qalasynyń qylmystyq ister jónindegi mamandandyrylǵan aýdanaralyq sotynda ashyq sot otyrysynda qaraldy. Er adamǵa Qylmystyq kodekstiń 99-babynyń 1-bóligimen (Adam óltirý) aıyp taǵyldy.
Oqıǵa ótken jyldyń 30 qarashasy kúni saǵat 20:00 shamasynda bolǵan.
Qalalyq sot málimetinshe, psıhıkalyq aýrýmen aýyratyn er adam spırttik ishimdik ishken. Mas halde óz úıinde týǵan ulymen jeke bas arazdyqtyń saldarynan paıda bolǵan eregis kezinde ashanalyq pyshaqpen balasyna birneshe ret jaraqat salǵan. Alǵan jaraqat saldarynan 28 jastaǵy jigit qaıtys bolǵan.
Sot saraptamalarymen, zattaı dáleldemelermen jáne kýálerdiń jaýabymen onyń kinási dáleldengen.
Sot otyrysynda prokýror aıyptalýshyny Qylmystyq kodekstiń 99-baby 1-bóliginde kózdelgen qylmysty jasaǵany úshin kináli dep tanyp, biraq qylmystyq jaýaptylyqtan bosatyp, psıhıatrııalyq statsıonarda májbúrlep emdeý sharalaryn qoldanýdy surady.
Jábirlenýshi men qorǵaý taraby prokýrordyń osy ustanymymen kelisti.
«Sot onyń qoǵamdyq qaýipti áreketti jasaǵan kezde esi durys emes kúıde bolǵanyna baılanysty qoǵamdyq qaýipti áreketti jasaǵany úshin qylmystyq jaýaptylyqtan bosatyp, oǵan ıntensıvti baıqaıtyn mamandandyrylǵan úlgidegi psıhıatrııalyq statsıonarda májbúrlep emdeý sharasyn qoldanyp, qylmystyq isti óndiristen toqtatty. Qaýly zańdy kúshine engen», - delingen qalalyq sot málimetinde.
