Shymkentte oıyn-saýyq mekemeleriniń jumys ýaqyty shekteledi

Shymkentte oıyn-saýyq mekemeleriniń jumys ýaqyty shekteledi. Bul týraly Shymkent qalasynyń ákimi Ǵabıt Syzdyqbekovtiń tóraǵalyǵymen ótken vedomstvoaralyq komıssııanyń kezekten tys otyrysynda málim boldy, dep habarlaıdy Kazinform.

Shymkenttik polıtseıler arnaıy reıd jumystarynyń barysynda táýlik boıy jumys isteıtin 164 oıyn-saýyq ornyn anyqtaǵan. Endi olardyń jumys isteý kestesine ózgerister engizilip, qyzmet kórsetý ýaqyty shektelýi múmkin. Sebebi, qaladaǵy quqyq buzýshylyqtar kóbinese sol aımaqtarda tirkelgen. Vedomstvoaralyq komıssııa otyrysynda Shymkent qalasy polıtsııa departamentiniń bastyǵy Dýman Taev keleńsizdikter jıi oryn alatyn oryndar men ýaqyttardy jáne jasalý sebepterin taldap, naqty usynystar aıtty.

«Quqyq buzýshylyqtar kóbinese juma, senbi, jeksenbi kúnderi keshki mezgilde tamaqtaný, oıyn-saýyq oryndarynda tirkeledi. Reıd jumystary barysynda táýlik boıy jumys isteıtin 164 oıyn-saýyq orny anyqtaldy. Osyǵan baılanysty jergilikti deńgeıde oıyn-saýyq mekemeleriniń jumys ýaqytyn aıqyndaý qajet», - dedi ol.

Shymkent qalasynyń ákimi quqyqbuzýshylyqtyń aldyn alý maqsatynda tamaqtaný oryndary men oıyn-saýyq ortalyqtarynyń jumys ýaqytyn shekteýdi aldaǵy ýaqytta zań sheńberinde qarastyratynyn, bul rette Astana qalasynyń tájirıbesin engizýdi tıimdi dep oılaıtynyn jetkizdi.

«Qatań tártip bolǵan jaǵdaıda ǵana zańsyzdyqtardy joıamyz. Azamattarymyzdyń qaýipsizdigin qamtýda jol erejelerin eskermeıtin kólik júrgizýshilerimen de jumysty kúsheıtý qajet. Qylmysqa jol beretin barlyq jaǵdaılarǵa tosqaýyl qoıyp, tıisti sharalardy kúsheıtýde birlese jumys isteýge shaqyramyn», - dedi Ǵabıt Ábdimajıtuly.