Shymkentte «Ótkenge qurmet — búgingi mindet» atty tazalyq aktsııasy ótti
ShYMKENT. KAZINFORM – «Taza Qazaqstan» respýblıkalyq ekologııalyq aktsııasy elimizdiń barlyq aımaǵynda keń óris aldy. Bul ıgilikti jumys Shymkentte de aýqymyn keńeıte tústi. Búgin tańerteńnen bastap qaladaǵy barlyq uıymdar men mekemelerdiń qyzmetkerleri, turǵyndar men erikti jastar, ardagerler men oqýshylar bul ıgilikti sharaǵa belsendilikpen atsalysty.
Qaladaǵy kóp qabatty turǵyn úılerdiń aýlalary men kóshelerde sanıtarlyq tazalyq jumystary men kóriktendirý, abattandyrý sharalary, shóp orý, aǵashtardy ákteý, qorshaýlar men oryndyqtardy syrlaý jumystary qyzý júrgizildi. Odan bólek, 3,3 shaqyrym ırrıgatsııalyq aryq júıesi, 9,7 shaqyrym jol jıekteri tazartylsa, 130 tonna kúl-qoqys shyǵaryldy.
Bul jumystarǵa 9500-den asa qala turǵyndary men 112 tehnıka jumyldyryldy.
Aktsııa aıasynda belsendi turǵyndardyń bastamasymen «Ótkenge — qurmet, búginge mindet» atty sharasyna qaladaǵy 92 meshittiń dinı qyzmetkerleri men erikti 3574 azamat qatystyp, 37 musylman zırattarynyń aýmaǵyn kúl-qoqystan, shópterden tazartylyp, qýraǵan aǵashtar kesildi.
Al, «Jasyl aımaq» aptalyǵy aıasynda uıymdastyrylǵan senbilikke jas ekologtardyń qosqan úlesi de zor boldy. Jasyl jelek qataryn kóbeıtýge atsalysqan jas ekologtarǵa qala turǵyndary da kómektesip, aǵash kóshetterin otyrǵyzý jáne aqtaý jumystaryn júrgizdi.
Igilikti bul is sharadan mektep oqýshylary da qalys qalǵan joq. Belsendiler mektep aýlalaryn abattandyryp, gúlder otyrǵyzdy.
Al elimizdiń kók baıraǵyn álemde jelbiretip júrgen sportshylarymyz qaladaǵy Ál-Farabı kóshesine 100 túp kóshet egip, tazalyq sharalaryn júrgizdi.
Qalanyń kórki onyń árbir turǵynynyń salaýatty ómiriniń kepili ekenin tereń túsinetin shymkenttikter respýblıkalyq ekologııalyq aktsııanyń joǵary deńgeıde ótýine yqylaspen kóńil bóldi.
Shymkent – shyraıly qala. Al onyń sáýleti men kórkin ajarlandyra túsýge ekologııalyq aktsııanyń tıgizip jatqan áseri tipti zor. Qalanyń árbir kóshesi men aýlalary tazalyqtyń talabyna saı jarqyraı tústi.
Jalpy tazalyq aktsııasynyń belsendilikpen ótýine Shymkent qalasy ákimdigine qarasty basqarmalar barynsha kóńil bólýmen qatar ózderi de qyzý jumyldy.
Tazalyq—densaýlyq kepili. Al densaýlyq — ár adamnyń ómiriniń baılyǵy. Osy qaǵıdany tek naýqandyq sharaǵa ǵana aınaldyrmaı, bizdiń kúndelikti tirshiligimizdiń tynysy men mindeti sanaı bilsek, «Taza Qazaqstannyń» beınesi de árqashan jaryq ta jarqyn bolatyny sózsiz.
